काठमाडौं (हाम्रो खेलकुद) – क्यानाडा भ्रमणमा रहेको नेपाली क्रिकेट टोलीले आज टि२० अभ्यास खेलमा ओन्टारियो क्रिकेट क्लबसँग खेल्दै छ । खेल नेपाली समय अनुसार साँझ ७ : ४५ मा किंग सिटीमा मेपल लिफ मैदानमा सुरु हुनेछ । एकदिवसिय अभ्यास खेलमा भने नेपालले ओन्टारियो क्रिकेट क्लबलाई ६९ रनले हराएको थियो ।

क्यानाडाको क्लब क्रिकेट टोलीसँग पनि नेपालले ब्याटिङमा भने राम्रो प्रदर्शन गर्न सकेको थिएन । त्यसैले आजको खेलमा खुलेर ब्याटिङ गर्न आवश्यक देखिन्छ । नेपालका ओपनर आसिफ र कुशल दुबैलाई राम्रो सुरुवात दिनुपर्ने हुन्छ । त्यसपछि रोहित कुमार पौडेल, दीपेन्द्रसिंह ऐरी, विनोद भण्डारी, आदिल अन्सराी र करण केसी हुनेछन् ।

आदिल र करण विष्फोटक ब्याटर हुन् । अभ्यास खेलमा विनोदले अर्धशतक प्रहार गरेको हुँदा मनोबल उच्च हुनेछ । तीव्र गतिका बलरमा किशोर महतो, करण केसी र सोमपाल कामी हुनेछन् । स्पिनरमा सन्दीप लामिछाने र बसिर अहमद हुनेछन् ।

ओन्टारियो कप्तानी नेपालबाट खेलि सकेका नरेश बुढाऐरले गर्नेछन् । बुढाऐरले पहिलो अभ्यास खेलमा नेपालविरुद्ध २९ रन प्रहार गरेका थिए । ओपनर रियाजखान पठान र जश शाहले पनि राम्रो सुरुवात दिलाएका थिए । ओन्टारियोको शील पटेल प्रमुख बलर हुन् ।

नेपालले क्यानाडासँग दुई एकदिवसिय खेलपछि टोली स्कटल्यान्ड जानेछ । नेपाल, स्कटल्यान्ड र नामिबियाबीच त्रिकोणात्मक ओडिआई सिरिज हुनेछ ।

नेपाललाई आगमी वर्ष हुने एकदिवसिय विश्वकप ग्लोबल छनोट सिधैं खेल्न र ओडिआई मान्यतालाई निरन्रता दिन बाँकी सबै खेल खेल्नु पर्ने हुन्छ । नेपाल १६ खेलमा ७ मा जित, ८ मा हार र १ खेल टाईका साथ १५ अंक जोड्दै पाँचौं स्थानमा छ ।

नेपाललाई सिधैं विश्वकप ग्लोबल छनोट खेल्न शीर्ष तीनमा पर्नुपर्ने हुन्छ । अन्यथा प्लेअफ खेल्नुपर्ने हुन्छ । प्लेअफबाट ६ टोलीको खेलमा पुन शीर्ष दुईमा पर्न सके विश्वकप ग्लोबल छनोट खेल्न पाउनेछ । ओडिआई मान्यतालाई निरन्तरता दिन अंक तालिकामा शीर्ष पाँचमा पर्नुपर्ने हुन्छ ।

नेपालको टोली :

सन्दीप लामिछाने (कप्तान), रोहित पौडेल (उपकप्तान), आसिफ शेख (विकेटकिपर), कुशल भुर्तेल, देव खनाल, दीपेन्द्रसिंह ऐरी, आरिफ शेख, करण केसी, सोमपाल कामी, आदिल अन्सारी, बसिर अहमद, किशोर महतो, पवन सरार्फ र विनोद भण्डारी (विकेटकिपर) ।