एजेन्सी – ओमानमा जारी टि२० एसिया कप छनोटमा प्रमुख दाबेदार टोली युएई कुवेतसँग एक विकेटले पराजित हुँदै स्तब्ध भएको छ । यो हारसँगै युएईको शीर्ष स्थानमा रहेर भारत र पाकिस्तानसँग एसिया कप खेल्ने सम्भावना कठिन बनेको छ । कुवेतले पहिलो पटक युएईलाई हराएको हो ।

जितको लागि १ सय ७४ रनको विजयी लक्ष्य पछ्याएको कुवेतलले १९.५ ओभरमा ९ विकेट गुमाउँदै पूरा गर्यो । कुवेतलाई अन्तिम ६ बलमा जितको लागि ९ रन चाहिँएको थियो । पहिलो बलमै यासिन पटेलले कासिफ दाउदलाई छक्का प्रहार गरे । पाँचौ बलमा मोहम्मद शफिकले चौका प्रहार गर्दै खेल सकाए । कुवेतले पहिलो पटक युएईलाई हराएको हो ।

कुवेतको जितमा ओपनर रवीजा संदारुवानले २५ बलमा १ चौका र ३ छक्कासहित सर्वाधिक ३४ रनमा आउट भए । मिट भास्वर २७, उस्मान पटेल २१ र कप्तान मोहम्मद अस्लाम १९ रनमा आउट भए । एडसन सिल्भा १४ बलमा २ चौका र २ छक्कासहित २५ रनमा आउट भए । सिल्भा नै खेलको प्लेयर अफ द म्याच चुनिए । युएईका बासिल हमीदले ४ ओभरमा २२ रन खर्चेर ३ विकेट लिए ।

त्यसअघि अल अमरेत क्रिकेट ग्राउन्डमा टस हारेर पहिला ब्याटिङको निम्तो पाएको युएईले निर्धारित २० ओभरमा ५ विकेट गुमाउँदै १ सय ७३ रन बनायो । युएईका ओपनर चिराग सुरीले ६१ बलमा ९ चौका र २ छक्कासहित सर्वाधिक ८८ रन बनाए । अर्का ओपनर मोहमम्द वासिम २३ बलमा ४ चौका र २ छक्कासहित ३५ रनमा आउट भए ।

वृत्य अरविन्दले २९ बलमा २ चौकासहित ३३ रन बनाए । अन्यले भने राम्रो प्रदर्शन गर्न सकेनन् । कुवेतका मोहम्मद शफिक, सैद मोनिव र शिराज खानले एक एक विकेट लिए । युएई शीर्ष स्थानमा रहन हङकङ र सिंगापुर दुबैलाई फराकिलो अन्तरले हराउनु पर्छ ।नेटरनरेटमा निर्भर रहनेछ । पहिलो खेलमा हङकङले सिंगापुरलाई ८ रनले हराएको थियो । सोमबार युएई र सिंगापुर खेल्नेछन् ।

लिगको खेलपछि शीर्ष स्थानमा रहने टोलीले अगष्ट २७ देखि युएईमा हुने एसिया कप खेल्न पाउनेछन् । छनोटबाट जाने टोलीले एसिया कपमा भारत र पाकिस्तानसँग खेल्न पाउनेछ । समूह बी मा श्रीलंका, बंगलादेश र अफगानिस्तान छन् ।

यो पनि : जब नेपालले भारत र पाकिस्तानसँग खेल्ने अवसर गुमायो