काठमाडौं (हाम्रो खेलकुद) – नवौं राष्ट्रिय खेलकुद अन्तर्गत क्रिकेट प्रतियोगितामा एनआरएनएले नेपाल एपिएफ क्लबविरुद्ध उत्कृष्ट ब्याटिङ गरि रहँदा वर्षाको कारण खेल रोकिएको छ ।

टियु क्रिकेट मैदानमा टस जितेर पहिला ब्याटिङ थालेको एनआरएनएले १३.३ ओभरमा २ विकेट गुमाउँदै १ सय २० रन बनाउँदा वर्षाको कारण खेल रोकिएको छ । एनआरएनएका कप्तान सुनाम गौतम ३५ बलमा २ चौका र २ छक्कासहित ४५ रनमा अविजित छन् । पृथु बास्कोटा २६ बलमा २ चौकासहित २६ रनमा अविजित छन् ।

तेस्रो विकेटका लागि सुनाम र पृथुले ६५ रनको साझेदारी गरेका छन् । ओपनर दीनेश खरेलले १६ बलमा २ चौका र ३ छक्कासहित ३२ रन जोड्दै आक्रामक सुरुवात दिलाए । खरेल तीव्र गतिका बलर अभिनाश बोहराको बलमा बोल्ड हुन पुगेका थिए । पहिलो खेलमा सुदूरपश्चिमविरुद्ध आक्रामक ४६ रन जोडेका सागर आज भने ६ रनमै आउट भए । सागर स्पिनर भुवन कार्कीको बलमा दोस्रो ओभरको अन्तिम बलमा बोल्ड भएका थिए ।

टियुमा दोस्रो खेलमा आज बागमती प्रदेश र सुदूरपश्चिमबीच खेल हुनेछ । उता मुलपानीमा आजको पहिलो खेलमा नेपाल पुलिस क्लब र मधेश प्रदेशबीचको खेल रद्ध भई सकेको छ । दोस्रो खेलमा आर्मी र कर्णालीबीचको हुने कार्यक्रम छ । तर वर्षाले हुने सम्भावना भने देखिदैन । टियुमा अहिले वर्षा जारी छ ।

समूह ए मा मधेश प्रदेश, लुम्बिनी प्रदेश, कर्णाली प्रदेश, नेपाल पुलिस क्लब, त्रिभुवन आर्मी क्लब र गण्डकी प्रदेश हुनेछन् । समूह बी मा एनआरएनए नेपाल, सुदूरपश्चिम प्रदेश, बागमती प्रदेश, प्रदेश नम्बर १ र नेपाल एपिएफ क्लब छन् । शीर्ष दुई दुई टोली सेमिफाइनलमा पुग्नेछन् । सेमिफाइनल भदौ ३० र फाइनल भदौ ३१ मा हुनेछ । टियुमा भारी वर्षा हुँदा आज पुनः खेल हुने सम्भावना भने देखिदैन ।