एजेन्सी – मध्यक्रमका ब्याटर भानुका राजपक्षेको अर्धशतकमा श्रीलंकाले टि२० एसिया कप २०२२ को फाइनलमा पाकिस्तानलाई उपाधि जित्न १ सय ७१ रनको बलियो लक्ष्य दिएको छ ।

दुबई इन्टरनेशल स्टेडियममा टस हारेर पहिला ब्याटिङ थालेको श्रीलंकाले निर्धारित २० ओभरमा ६ विकेट गुमाउँदै १ सय ७० रन बनायो । श्रीलंकाका भानुका राजपक्षे ४५ बलमा ६ चौका र ३ छक्कासहित सर्वाधिक ७१ रनमा अविजित रहे । राजपक्षेले १८ औं ओभरको चौथो बलमा ब्यक्तिगत ४६ रनमा शादब खानले क्याच ड्रप गर्दा जीवनदान पाएका थिए ।

वानिन्दु हसरंगा २१ बलमा ५ चौका र १ छक्कासहित ३६ रनमा आउट भए । एक समय ५८–५ को खराब अवस्थामा पुगेको श्रीलंकालाई छैटौं विकेटका लागि राजपक्षे र हसरंगाले ३६ रनमा ५८ रनको साझेदारी गर्दै उत्कृष्ट पूनरागन गराए । तीव्र गतिका बलर नसिम शाहले पहिलो ओभरको तेस्रो बलमा कुशल मेन्डिसलाई शून्यमा बोल्ड गरे । नसिमको स्विंग बलमा कुशल बोल्ड भए ।

चौथो ओभरको दोस्रो बलमा हरिस रौफले ओपनर पाथुम निसंकालाई ८ रनमा बाबर आजमबाट क्याच गराउँदै प्रमुख सफलता दिलाए । छैटौं ओभरको पहिलो बलमा हरिस रौफले धनुष्का गुणाथिलकालाई एक रनमा बोल्ड गर्दै श्रीलंकालाई ३६–३ को अवस्थामा पुर्याए ।

पार्ट टाईम स्पिनर इफ्तिखार अहमदले धनन्जय डि सिल्भालाई २८ रनमा कट एण्ड बोल्ड गरेपछि श्रीलंका ५३–४ को कमजोर अवस्थामा पुगेको थियो । नवौं ओभरको पाँचौं बलमा शादब खानले श्रीलंकाका प्रमुख हतियार कप्तान दासुन शनकालाई २ रनमा बोल्ड गरेपछि श्रीलंकाको बलियो योगफलको सम्भावना टाढिएको थियो ।

तर भानुका राजपक्षेले राम्रो पूनरागमन गराए । पाकिस्तानका तीव्र गतिका हरिस रौफले ४ ओभरमा २९ रन खर्चेर ३ विकेट लिए । शादब खानले ४ ओभरमा २८ रन खर्चेर १ विकेट लिए । नसिम शाह र इफ्तिखार अहमदले एक एक विकेट लिए । सुपर फोरमा श्रीलंकाले पाकिस्तानलाई ५ विकेटले हराएको थियो ।