काठमाडौं (हाम्रो खेलकुद)– नाबालिग किशोरी बलात्कारको आरोपमा पक्राउ परेका राष्ट्रिय क्रिकेट टोलीका निलम्बित कप्तान सन्दीप लामिछाने माथि अनुसन्धानका लागि काठमाडौं जिल्ला अदालतले प्रहरीलाई ७ दिनको म्याद दिएको छ ।

सन्दीपको पक्षमा रहेका कानुन व्यवसायिक अधिवक्ता सरोजकृष्ण घिमिरेका अनुसार अनुसन्धानका लागि अदालतले असोज २० गतेबाट लागू हुने गरि ७ दिनको म्याद दिएको छ । असोज २० गते स्वदेश फर्केका सन्दीप त्रिभुवन अन्तर्राष्ट्रिय विमानस्थलबाटै पक्राउ परेका थिए । उनलाई प्रहरी बृत गौशालामा राखिएको छ । दशै विदापछि सोमबार मात्र अदालत खुलेकोले म्याद दिनका लागि प्रहरीले सन्दीपलाई अदालत लगेको थियो ।

राष्ट्रिय टोलीका नेतृत्व गर्दै भदौ ६ गते केन्या पुगेका सन्दीप विदेशकै रहेका बखत भदौ २१ गते नाबालिग किशोरीले उनीविरुद्ध किटानी जाहरी दिएको प्रहरीले जनाएको थियो । सन्दीपले केन्या जानु अघिल्लो दिन भदौ ५ गते नगरकोट घुमाएर काठमाडौंको एक होटलमा राती आफूलाई पटक पटक बलात्कार गरेको नाबालिकाले प्रहरीलाई बयान दिइकी थिइन् ।

केन्यासँगको पाँच खेलको टि ट्वान्टी अन्तर्राष्ट्रिय क्रिकेट सिरिज खेलिसकेपछि सन्दीप क्यारेवियन प्रिमियर लिग (सिपिएल) खेल्न वेष्ट इन्डिज पुगेका थिए । सन्दीपले सामाजिक सञ्जालमार्फत पटक पटक आफू निर्दोष रहेको दाबी गर्दै आएका छन् । नेपाल क्रिकेट संघ (क्यान) का अध्यक्ष चतुरबहादुर चन्दले प्रहरी बृत गौशाला पुगेर भेट्दा पनि उनले आफू निर्दोष रहेको बताएको चन्दले सञ्चारमाध्यमलाई बताएका थिए ।