काठमाडौं (हाम्रो खेलकुद) – शीर्षक्रमका ब्याटर मार्नस लाबुसेनको सानदार शतकमा घरेलु टोली अष्ट्रेलियाले पहिलो टेस्ट खेलमा वेस्टइन्डिजविरुद्ध मजबुत ब्याटिङ गरेको छ । पर्थमा टस जितेर पहिला ब्याटिङ रोजेको अष्ट्रेलियाले पहिलो दिन ९० ओभरमा २ विकेट गुमाउँदै २ सय ९३ रन बनाएको छ ।

अष्ट्रेलियाका मार्नस लाबुसेन २ सय ७० बलमा १६ चौका र १ छक्कासहित १ सय ५४ रनमा अविजित छन् । लाबुसेनको यो टेस्ट करिअरको आठौं शतक हो । पर्थमा उनको दोस्रो शतक पर्दछ । लाबुसेनले १ सय ९२ बलमा १३ चौका र १ छक्कासहित शतक पूरा गरेका थिए । १ सय ५० रन भने लाबुसेनले २ सय ६३ बलमा पूरा गरेका थिए ।

स्टिभ स्मिथ १ सय ७ बलमा ७ चौकासहित ५९ रनमा क्रिजमा छन् । तेस्रो विकेटका लागि स्मिथ र लाबुसेनले १ सय ४२ रनको अविजित साझेदारी गरेका छन् । तीव्र गतिका बलर जयडेन सिल्सले ओपनर डेविड वार्नरलाई ५ रनमा बोल्ड गरे । दोस्रो विकेटका लागि मार्नस लाबुसेन र उस्मान खवाजाले १ सय ४२ रनको साझेदारी गदै बलियो योगफलको आधार तय पारेका थिए ।

उस्मान खवाजा १ सय ४९ बलमा ५ चौका र १ छक्कासहित ६५ रनमा क्याच आउट भए । काइल मेयर्सको बलमा खवाजा आउटसाइड लागेर विकेटकिपर जोशुवा डा सिल्भाबाट क्याच हुन पुगेका थिए । वेस्टइन्डिज र अष्ट्रेलियाबीच दुई टेस्ट खेलको सिरिज हुनेछ । दोस्रो टेस्ट डिसेम्बर ८ देखिसुरु हुनेछ ।