काठमाडौं (हाम्रो खेलकुद) – युवा विकेटकिपर कन्चन श्रेष्ठको अर्धशतकमा बागमती प्रदेशले इटहरीमा जारी प्रधानमन्त्री कप महिला टि२० राष्ट्रिय प्रतियोगितामा गण्डकी प्रदेशलाई ३७ रनले पराजित गरेको छ । बागमती अन्तिम खेलमा जितका साथ बाहिरिएको छ ।

जनता क्रिकेट पार्कमा टस जितेर पहिला ब्याटिङ थालेको बागमतीले निर्धारित २० ओभरमा ५ विकेट गुमाउँदै १ सय ३५ रन बनायो । बागमतीकी कन्चन श्रेष्ठले ५२ बलमा ९ चौकासहित सर्वाधिक ५६ रनको योगदान दिइन् । कप्तान अश्मिना कर्माचार्यले १६ बलमा २ चौकासहित १८, अश्मिता खरेल १२, हेलिसा गुरुङ ११ र सोनी पाख्रिनले १३ रन बनाइन् ।

गण्डकीको कुसुम गोदार, सृष्टी जैशी, निरुता र सीमाना केसीले एक एक विकेट लिए ।

जितको लागि १ सय ३६ रनको विजयी लक्ष्य पछ्याएको गण्डकीले निर्धारित २० ओभरमा ५ विकेट गुमाउँदै ९८ रन बनायो । गण्डकीको सीमना केसीले ५६ बलमा ३ चौकासहित सर्वाधिक ३६ रनमा अविजित रहिन् । कप्तान सृष्टी जैशीले ३८ बलमा ५ चौकासहित ३४ रन जोडिन् । अन्य ब्याटरले राम्रो गर्न सकेनन् ।

बागमतीको अश्मिना कर्माचार्यले ४ ओभरमा १९ रन खर्चेर ३ विकेट लिइन् । विपिशा शाही र सविका यादवले एक एक विकेट लिए ।

समूह ए मा रहेको बागमती ३ खेलमा २ मा हार र एकमा जितसहित तेस्रो स्थानमा रहेर बाहिरियो । गण्डकी तीनै खेलमा पराजित हुँदै अंक विहीनका साथ पुछारमा रहेर बाहिरियो ।

 समूह ए बाट सुदूर ३ खेलमा ६ अंकका साथ शीर्ष स्थानमा रह्यो । एपिएफ ३ खेलमा २ मा जित र १ मा हारसहित दोस्रो स्थानमा रह्यो । समूह बी मा प्रदेश एक ३ खेलमा ६ अंकका साथ शीर्ष स्थानमा रह्यो । मधेश ३ खेलमा २ मा जित र एक मा हासहित दोस्रो स्थानमा रह्यो ।

पहिलो सेमिफाइनल खेलमा सुदूर र मधेशबीच प्रतिस्पर्धा हुनेछ । दोस्रो सेमिफाइनल खेल प्रदेश एक र एपिएफबीच प्रतिस्पर्धा हुनेछ । सेमिफाइनल शुक्रबार र फाइनल शनिबार हुनेछ ।