काठमाडौं (हाम्रो खेलकुद) – तीव्र गतिका बलिङ अलराउन्डर गुलशन झाले सिनियर खेलाडी भएको हुँदा यू-१९ टोलीलाई विश्वकपमा पुर्याउने धेरै ठूलो जिम्मेवारी भएको बताएका छन् ।

टियु क्रिकेट मैदानमा बन्द प्रशिक्षणमा ब्यस्त रहेका गुलशनले उक्त प्रतिक्रिया दिएका हुन् । ‘यु-१९ को तयारी एकदमै राम्रो भएको छ । सबै खेलाडीहरु कडा मिहिनेत गरि रहेका छन् । ब्याटिङ, बलिङ र फिटनेश सबैमा सुधार पनि भएको छ । टिम एकदमै सन्तुलित छ’, गुलशनले भने ।

‘एउटा सिनियर खेलाडीको रुपमा य–ू१९ लाई विश्वकपमा पुर्याउने धेरै ठूलो जिम्मेवारी छ । आफ्नो राम्रो गरेर टिमलाई त्यहाँ सम्म पुर्याउ’, उनले भने । गुलशनले नेपालबाट ९ ओडिआई र एक टि२० आई खेल खेलेका छन् । गुलशनले तीव्रगतिसँगै तल्लोक्रममा राम्रो ब्याटिङ गर्ने गर्दछन् ।

नेपालले हालसम्म ७ पटक यू१९ विश्वकप खेलेको छ । ठूला टेस्ट टोलीलाई स्तब्ध पार्न सफल नेपालले २००६ को यू-१९ विश्वकपमा प्लेट फाइनल जितेको थियो । नेपालले उक्त विश्वकपको प्लेट फाइनलमा न्युजिल्यान्डलाई एक विकेटले हराउँदै उक्त उपाधि जितेको थियो । तर २०१६ पछि भने नेपालले यू१९ विश्वकप खेल्न सकेको छैन ।

गुलशनले गतवर्ष देव खनालको कप्तानीमा यू-१९ एसिया कप खेलेका थिए । यस पटक देव र गुलशन यू-१९ टोलीमा भएका सिनियर टोलीबाट खेलि सकेका अनुभवी खेलाडी समेत हुन् ।

‘हामी आफ्नो दुई सय प्रतिशत दिने हो । अव त्यहाँ गएर खेल जित्ने हो । यो स्तरमा सबै बराबर हुन्छ । कोही सानो र ठूलो हुँदैन । जसले बढी मिहिनेत लगायो त्यसैले जित्ने हो’, उनले भने । गतवर्ष भने कोरोना महामारीको कारण यू१९ विश्वकप एसिया क्षेत्र छनोट नहुँदा नेपालले खेल्न पाएन । युएई सिधैं छनोट भएको थियो ।

‘गतवर्ष यू-१९ छनोट नहुँदा नराम्रो लागेको थियो । गतवर्ष जे भयो भयो । अव आउनेमा केन्द्रित हौं । सिनियर खेलाडीहरुले केहि गल्ती भएमा सुधार गर्नुपर्ने हुन्छ । विश्वकप खेल्नेमा दुई सय प्रतिशत आत्माविश्वास छ’, गुलशनले भने ।

प्रतियोगिता फेब्रुअरी अन्तिममा युएईमा हुनेछ । प्रतियोगितामा नेपाल, युएई, हङकङ, कुवेत, मलेसिया र सिंगापुरबीच प्रतिस्पर्धा हुनेछ । विजेता टोलीले २०२४ मा श्रीलंकामा हुने यू–१९ विश्वकप खेल्न पाउनेछ ।

‘विश्वकप खेल्ने ठूलो सपना छ’– देव खनाल

‘नेपालले श्रीलंकमा हुने विश्वकप खेल्नेमा विश्वास छ’– टमाटा