काठमाडौं (हाम्रो खेलकुद) – नेपालले आइसिसी यू-१९ विश्वकप एसिया क्षेत्र छनोटमा सिंगापुरविरुद्ध राम्रो ब्याटिङ प्रदर्शन गरेको छ । युएईको आजमानमा रहेको इर्डेन गार्डेन ओभलमा टस जितेर पहिला ब्याटिङको रोजेको नेपालले ३३ ओभरमा २ विकेट गुमाउँदै १ सय ३९ रन बनाएको छ ।

डेब्यू खेल खेलेका ओपनर आकाश त्रिपाठी ९७ बलमा ६ चौका र १ छक्कासहित ७३ रनमा अविजित छन् । कप्तान देव खनाल २० बलमा १ चौकासहित १३ रनमा खेलेका छन् ।

युवा ओपनर अर्जुन कुमाल ६७ बलमा ३ चौकासहित ३७ रनमा बोल्ड आउट भए । दोस्रो विकेटका लागि अर्जुन र आकाशले ९३ रनको साझेदारी गरेका थिए । अर्जुन महियु भाटियाको बलमा बोल्ड आउट हुन पुगे । ओपनर दीपक बोहरा ५ रनमा आउट भएपनि अर्जुन र आकाशले राम्रो साझेदारी गर्दै उत्कृष्ट सुरुवात दिलाएका थिए ।

नेपालले आजको खेलमा नेपाली यू-१९ टोलीमा ७ खेलाडीलाई डेब्यू दिएको छ । दीपक बोहरा, आकाश त्रिपाठी, सुवास भण्डारी, हेमन्त धामी, दीपक डुम्रे, दीपक बोहरा र मिलन बोहराले पहिलो पटक नेपाली यू-१९ टोलीबाट खेलेका छन् । नेपालले पहिलो खेलमा आकाश चन्द, दीपेश कँडेल र उत्तम थापामगरलाई बेन्चमा राखेको छ ।

उपाधिको प्रमुख दाबेदार नेपाल सिंगापुरलाई हराउँदै प्रतियोगितामा सानदार सुरुवात गर्न चाहन्छ । प्रतियोगितामा नेपाल, हङकङ, मलेसिया, सिंगापुर, युएई र कुवेत छन् । सिंगल राउन्ड रोविनको आधारमा हुने प्रतियोगिता विजेताले २०२४ मा श्रीलंकामा हुने यू१९ विश्वकप खेल्न पाउनेछ।