एजेन्सी – काइरन पोलार्डको उत्कृष्ट ब्याटिङमा मुल्तान सुल्तानले पाकिस्तान सुपर लिग (पिएसएल) को पहिलो क्वालिफायर खेलमा लाहोर कलन्दर्सलाई ८४ रनले हराउँदै फाइनलमा पुगेको छ।

जितको लागि १ सय ६१ रनको विजयी लक्ष्य पछ्याएको लाहोर १४.३ ओभरमा ७६ रनमा अल आउट भयो । लाहोरका साम बिलिंग्सले २७ बलमा १ चौकासहित सर्वाधिक १९ रन बनाए । फखार जमान ६ र सिकन्दर राजा १ रनमा आउट भए ।

मुल्तानका शेल्डन कटरेलले ३ ओभरमा २९ रन खर्चेर ३ विकेट लिए । अनवार अली, अब्बास अफ्रिदी, र काइरन पोलार्डले एक एक विकेट लिए । उस्मा मिरले २ ओभरमा १२ रन खर्चेर २ विकेट लिए ।

त्यसअघि गद्दाफी स्टेडियम लाहोरमा टस जितेर पहिला ब्याटिङ रोजेको मुल्तानले निर्धारित २० ओभरमा ५ विकेट गुमाउँदै १ सय ६० रन बनाएको थियो । मुल्तानका काइरन पोलार्डले ३४ बलमा १ चौका र ६ छक्कासहित सर्वाधिक ५७ रन बनाए । मोहम्मद रिजवान ३३, राइली रोसोउ १३, उस्मान खान २९ र टिम डेविडले २२ रन बनाए ।

लाहोरका हरिस रौफले ४ ओभरमा ३४ रन खर्चेर ३ विकेट लिए । आज एलिमिनेटर खेलमा इस्लामबाद युनाइटेड र पेशावार जाल्मीबीच प्रतिस्पर्धा हुनेछ । जसको विजेताले फाइनलमा स्थान बनाउन लाहोरसँग शुक्रबार खेल्नेछ । फाइनल आइतबार हुनेछ।