एजेन्सी – भारतले आइसिसी टि२० विश्वकप २०२१ मा आइतबार पाकिस्तानसँग १० विकेटको लज्जास्पद हार बेहोर्न पुग्यो । सुपर १२ को समूह २ मा रहेको पाकिस्तानले विश्वकप इतिहासमै पहिलो पटक भारतलाई पराजित गरेको थियो ।

दुबई इन्टरनेशल क्रिकेट मैदानमा टस हारेर ब्याटिङको निम्तो पाएको भारतले निर्धारित २० ओभरमा ७ विकेटको क्षतिमा १ सय ५१ रन बनाएको थियो । भारतका कप्तान विराट कोहलीले ४९ बलमा ५ चौका र १ छक्का सहित सर्वाधिक ५७ रन बनाएका थिए । पाकिस्तानका तीव्र गतिका युवा बलर शाहिन शाह अफ्रिदीले ४ ओभरमा ३१ रन खर्चेर प्रमुख ३ विकेट लिएका थिए । अफ्रिदीले उत्कृष्ट बलिङ सामू विश्वस्तरिय ब्याटरको बाहुल्यता भएको भारत मध्यम योगफलमै समेटिएको थियो ।

जितका लागि १ सय ५२ रनको विजयी लक्ष्य पछ्याएको पाकिस्तानले १७.५ ओभरमा कुनै पनि विकेट नगुमाई पूरा गर्यो । पाकिस्तानको जितमा ओपनर मोहम्मद रिजवान ५५ बलमा ६ चौका र ३ छक्का सहित ७९ रनमा अविजित थिए । कप्तान बाबर आजम ५२ बलमा ६ चौका र २ छक्का सहित ६८ रनमा अविजित थिए ।

यसअघि भारतले टि२० विश्वकप र एकदिवसिय विश्वकपमा पाकिस्तानसँग हार बेहोरेको थिएन । पाकिस्तानसँगको हारले भारतलाई शीर्ष दुईमा रहेर सेमिफाइनल खेल्ने सम्भावना बलियो बनाउन आइतबार न्युजिल्यान्डलाई हराउनै पर्नेहुन्छ । अन्यथा भारत समूह चरणबाटै घर फर्किने समीकरण उच्च छ । त्यसैले भारतलाई जित्नैपर्ने दबाब छ । यता पाकिस्तानसँग ५ विकेटले पराजित भएको न्युजिल्यान्डलाई पनि जित्नै पर्ने दबाब छ ।

भारतले न्युजिल्यान्डलाई हराउन टोलीमा केहि परिवर्तन र सुधार गर्नुपर्ने देखिन्छ । न्युजिल्यान्डसँग खेल्नुअघि भारतले सुधार गर्नुपर्ने तीन कमजोरी ।

छैटौं बलरको विकल्प

भारत पाकिस्तानसँगको खेलमा चार प्रमुख बलरका साथ मैदान उत्रेको थियो । हार्दिक पान्ड्या र रविन्द्र जडेजा अलराउन्डरको रुपमा थिए । जस्प्रित बुमराह, मोहम्मद शामी र भुवनेश्वर कुमार प्रमुख तीव्र गतिका बलर थिए । स्पिनर बरुण चक्रवर्ती र जडेजा थिए । भारतसँग एक बलरले खराब प्रदर्शन गर्दा अर्को पार्टटाइमको राम्रो विकल्प थिएन ।

हार्दिक ब्याटिङ गर्नेक्रममा कुँममा दुखाईपछि दोस्रो इनिङमा फिल्डिङमा आएका थिए । उनको स्थानमा ईशान किशनले फिल्डिङ गरेका थिए । सधैं प्रमुख बलर चल्छन् भन्ने हुँदैन । त्यो अवस्थामा पार्टटाइम बलर राम्रो विकल्प हुन् । तर भारतसँग छैटौं बलरको विकल्प थिएन । भुवनेश्वर र शामीको सुरुवात हुन सकेन । कमजोर बलिङ गरेकै बलरलाई निरन्तरता गर्नु पर्ने बाध्यता थियो । जसले ब्याटरको मनोबलमा पनि फरक पार्यो । पाकिस्तानका ब्याटरले त्यसको भरपूर्ण फाइदा उठाउँदै सहज जित दिलाए ।

शामीले ३.५ ओभरमा ४३ रन खर्चेका थिए । बुमराहले ३ ओभरमा २२ र भुवनेश्वर कुमारले २५ रन खर्चेका थिए । स्पिनर बरुण चक्रवर्तीले ४ ओभरमा ३३ र रविन्द्र जडेजाले २८ रन खर्चेका थिए । भारतीय टोलीको बलिङ सन्तुलनको लागि छैटौं बलरको विकल्प आवश्यक देखिन्छ । हार्दिक पूर्णरुपमा फिट भएमा उनी हुने छन् । अन्यथा रविचन्द्रन आश्विन र शार्दूल ठाकुर मध्य एक राम्रो विकल्प देखिन्छन् ।

ब्याटिङ सन्तुलनको लागि ईशान आवश्यक

भारतीय ब्याटरलाई बायाँ हाते बलर सधैं घातक बन्दै आएका छन् । बायाँ हाते बलरका साथ स्वींग बलमा भारतीय ब्याटर फस्दै आएका छन् । रोहित र राहुल पनि अफ्रिदीको स्वींग बलमै आउट भएका थिए । कोहलीको समस्या रहँदै आएको छ । अर्कोतर्फ भारतीय शीर्ष ६ ब्याटरमा ऋषभ पन्त मात्र बायाँ हाते ब्याटर हुन् । जसले गर्दा दायाँ र बायाँ हाते सन्तुलन मिल्न सकेको छैन । दायाँ हाते भारतीय ब्याटरलाई बायाँ हाते बलर हाबी हुँदै आएका छन् । यो अवस्थामा बायाँ हाते ईशान किशन राम्रो विकल्प हुन् ।

न्युजिल्यान्डका तीव्र गतिका बलर ट्रेन्ट बोल्ट नयाँ बलका साथ इन स्वींग बलका लागि माहिर छन् । बोल्ट भारतीय ब्याटरमाथि निरन्तर घातक बन्दै आएका पनि छन् । ईशान किशन टि२० विशेष ब्याटर हुन् । आक्रामक ब्याटिङको क्षमता राख्छन् । केहि समय अघि आइपिएलमा मुम्बई इन्डियन्सबाट सनराइजर्स हैदराबादविरुद्ध ३२ बलमा ११ चौका र ४ छक्का सहित ८४ रनको इनिङ खेलेका थिए । वार्मअप खेलमा इंग्ल्यान्डविरुद्ध किशनले ४६ बलमा ७ चौका र ३ छक्का सहित ७० रनको इनिङ खेलेका थिए ।

किशन भारतीय ओडिआई र टि२० आईमा डेब्यूमै अर्धशतक प्रहार गर्ने खेलाडी समेत हुन् । उनको आगमनले ब्याटिङ सन्तुलन हुने देखिन्छ । त्यसको लागि भारतले रोहित शर्मा र लोकेश राहुल मध्य एकलाई बेन्च वा तल्लोक्रममा खेलाउनु पर्नेहुन्छ । ब्याटिङ सन्तुलनको लागि बायाँ हाते ब्याटर किशनको आवश्यक देखिन्छ ।

शीर्षक्रमका ब्याटरबाट उत्कृष्ट प्रदर्शनको आवश्यक

कुनैपनि टोलीको शीर्षक्रमको उत्कृष्ट योगफल बिना ठूलो योगफल बन्न सक्दैन । अर्कोतर्फ भारतको नतिजामा शीर्षक्रमका ब्याटरको प्रदर्शनले बढी प्रभाव पार्दै आएको छ । पाकिस्तानसँगको खेलमा शीर्षक्रमका ब्याटर चल्न सकेनन् । शाहिन अफ्रिदीले भारतविरुद्ध ड्रिम सुरुवात गरेका थिए । ओपनर रोहित शर्मालाई पहिलो ओभरको चौथो बलमै शून्यमा एलबीडब्लू आउट गरे ।

तेस्रो ओभरको पहिलो बलमा अफ्रिदीले लोकेश राहुललाई ३ रनमा बोल्ड आउट गरे । छैटौं ओभरको चौथो बलमा सूर्यकुमार यादव ११ रनमा क्याच आउट भएपछि भारत समस्यामा परेको थियो । खराब सुरुवातको कारण भारत कुनैपनि समय खेलमा हाबी हुन सकेन । मध्यक्रम र तल्लोक्रमका ब्याटर खराब सुरुवातको कारण खुलेर खेल्न सकेनन् ।

कुनैपनि टोलीले पहिलो पावर प्लेमै तीन प्रमुख विकेट गुमाउँछ भने जितको लागि कठिन पर्छ । शीर्षक्रमका ब्याटरको कमजोर प्रदर्शननै भारतको हारको प्रमुख कारण बनेको थियो । शीर्षक्रमका ब्याटरले उत्कृष्ट सुरुवात दिलाउन आवश्यक देखिन्छ । यो पनि पढ्नुहोस : पाकिस्तानसँग हारपछि भारतीय टोलीमा देखाएका पाँच दुविधा