सुबास हुमागाईं, काठमाडौं

मिडफिल्डर जगजित श्रेष्ठ ४ वर्षपछि नेपाली राष्ट्रिय फुटबल टोलीमा पुनरागमन गर्ने लक्ष्यमा छन् । लामो समयदेखि अष्ट्रेलियामा बस्दै आएका जगजित ए डिभिजन लिग खेल्न नेपाल फर्केका थिए । लिगमा त्रिभुवन आर्मी फुटबल क्लबबाट प्रभावशाली प्रदर्शन गरेसँगै प्रशिक्षक अब्दुल्लाह अलमुताइरीले जगजितलाई प्रारम्भिक छनोटमा समेटेका हुन् ।

जगजितको खेल्ने शैली हालको नेपाली टोलीसँग मेल खान्छ । प्राविधिक रुपमा निपुण उनी विंगरको भूमिकामा खेल्छन् । नेपालले हाल खेल्दै आएको ४-३-३ को फर्मेसनमा जगजित दुवै विंगमा खेल्न सक्छन् । बायाँ खुट्टा बढी चल्ने जगजितको क्रसिङ मात्र होइन, कट इन गरेर पोस्टतर्फ प्रहार गर्ने शैली पनि अब्बल छ । बल कन्ट्रोल उत्कृष्ट रहेका उनको चनाखो फुटबल सेन्सका कारण फरवार्डको पछाडी नम्बर १० को भूमिकामा पनि प्रयोग गर्ने विकल्प पनि रहन्छ ।

प्रशिक्षक अलमुताइरीले मंगलबार भएको पहिलो दिनको प्रशिक्षणमा जगजितलाई दायाँ विंगरको रुपमा प्रयोग गर्ने जमर्को गरेको संकेत छ । उनलाई विपक्षी राइट ब्याकलाई पोजिसनबाट बाहिर ल्याउँदै सहकर्मीलाई स्पेस बनाउने, आफैं कट इनको लागि अवस्था सिर्जना गर्ने पक्षमा अब्दुल्लाह केन्द्रित देखिन्थे । अब्दुल्लाहले जगजितको क्षमतालाई मध्यनजर गर्दै टोलीमा समेटेको आभास प्रशिक्षण ड्रिल र उनीमाथि खर्चेको समयले पनि प्रष्ट पारेको थियो ।

जगजित आफैंले पनि अन्य विदेशी प्रशिक्षकको तुलनामा अब्दुल्लाह आफ्नो रणनीतिलाई लिएर कडा रहेको अभिव्यक्ति दिए । ‘प्रशिक्षक अब्दुल्लाह एकदम प्रोफेसनल र सिधा व्यक्ति पाएँ । हामीले आक्रामक रणनीतिमा गर्नुपर्ने कार्यलाई लिएर सिधा भन्नुहुन्छ । विदेशी प्रशिक्षक आफ्नो रणनीतिलाई लिएर कडा नै हुनुहुन्थ्यो, प्रशिक्षक अब्दुल्लाह थप कडा रहेको पाएँ । हामीलाई बिस्तारै बिस्तारे सिकाइरहनुभएको छ । मलाई रणनीतिक पक्षमा प्रशिक्षण देखेर एकदम खुसी लागेको छ,’ उनले थपे ।

जगजित पछिल्लो पटक जापानी प्रशिक्षक ग्योतोकु कोजी राष्ट्रिय टोलीमा रहँदा टोलीमा परेका थिए । सन् २०१७ मा फिलिपिन्सविरुद्ध भएको एसियन कप छनोटको खेलमा उनी टोलीमा समावेश भएका थिए । अनिल गुरुङले संन्यास लिएको उक्त खेलमा प्रशिक्षक कोजीले झन्डै डेढ वर्षपछि टोलीमा समेटेपनि जगजित मैदान उत्रन भने पाएका थिएनन् ।

जगजितले त्यसअघि सन् २०१५ मा भारतको केरलामा भएको साफ च्याम्पियनसिपमा खेलेका थिए । उनी समूह चरणका दुवै खेलमा मैदान उत्रेका थिए । जगजितले सन् २०१६ को सुरुवातमा भएको १२ औं दक्षिण एसियाली खेलकुद (साग) मा स्वर्ण पदक जितेका थिए । उनी बंगबन्धु गोल्डकप जित्ने टोलीका पनि सदस्य थिए ।

अष्ट्रेलियाबाट यस सिजन लिग खेल्न आएका जगजितले राम्रो प्रदर्शन गरेका छन् । सुरुवातमा आर्मीको टोलीमा भिज्न समय लागेका उनी टोलीका महत्त्वपूर्ण खेलाडीका रुपमा स्थापित भएका छन् । पछिल्लो खेलमा फ्रेन्ड्सविरुद्ध ३-१ को जित हासिल गर्दा जगजित तीनै गोलमा आबद्ध थिए । उनी खेलको प्लेयर अफ द म्याच पनि घोषित भएका थिए । यो उनको दोस्रो प्लेयर अफ द म्याच उपाधि हो ।

जगजित आफैं आर्मीको टोलीमा प्रदर्शन जम्दै गएको बताउँछन् । ‘आर्मीको टिममा सुरुमा मलाई भिज्न केही कठिन भयो । नेपाल आउनेबितिक्कै खेलेको हुनाले पनि मौसमका कारण केही अस्वस्थ महसुस गरेको थिएँ । आर्मीको खेल्ने शैली फरक रहेकाले केहि कठिनाइ भएको थिए । अझैपनि हामीले पूर्ण रुपमा कम्बिनेसन बनेको छैन । तर पहिलाभन्दा सुधार भएको छ । दोस्रो स्थानसम्म आउन सक्छौं होला,’ उनले भने ।

जगजितले पहिलो दिनको प्रशिक्षणपछि राष्ट्रिय टोलीमा फर्कन पाउँदा खुसी लागेको बताए । ‘एकदम खुसी लागिरहेको छ । वातावरण निकै परिवर्तन भएको छ । प्रशिक्षकको तरिका पनि प्रोफेसनल छ । एकदम मजा आइरहेको छ,’ उनले भने ।

जगजितले आफू अन्तिम टोलीमा परेको अवस्थामा टोलीका लागि योगदान गर्न सक्ने अपेक्षा रहेको बताए । ‘हामी बल पाएपछि आक्रमणमा ध्यान दिइरहेका छौं । मेरो आफ्नो खेल्ने शैली पनि त्यहि नै हो । यदि अन्तिम टोलीमा परें भने मैले आफ्नो योगदान दिन सक्छु जस्तो लाग्छ,’ उनले थपे ।

जगजितले आफ्नो लागि यो टोलीमा पर्ने अन्तिम अवसर रहेको पनि बताए । ‘मैले यो अवसरलाई एकदम सकारात्मक रुपमा लिएको छु । धेरै वर्षपछि एउटा अवसर आएको छ । मेरो लागि यो अन्तिम अवसर हुन सक्छ । मेरो करिअरलाई सार्थकता दिने अवसर पनि हो,’ जगजितले प्रष्ट पारे ।

जगजितले राष्ट्रिय टोलीबाट सन् २०११ मा भएको भुटानविरुद्ध मैत्रीपूर्ण खेलमा डेब्यु गरेका थिए । दोस्रो खेलमा नै उत्तर कोरियासँग रातो कार्ड पाएका उनले रिसाहा खेलाडीको पहिचान बनाएका थिए । युवा अवस्थामा घरेलु फुटबलमा पनि मैदानभित्र उतारचढाव खेपेका उनले पछिल्लो समय भने आफू परिवर्तन भएको देखाएका छन् । त्यसो त आर्मीका प्रशिक्षक नविन न्यौपानेले पनि जगजित फेरिएर आएको अभिव्यक्ति दिएका थिए ।

आर्मीको आक्रमणमा लगातार प्रभाव छाड्दै आएका जगजितले आर्मीका लागि २ गोल र २ असिस्ट दिएका छन् । तथ्यांक हेर्दा उनले हरेक दुईमध्य औसत एक खेलमा गोल वा असिस्ट प्रदान गरेको तथ्यांक छ । तर जगजितको प्रदर्शन तथ्यांक मात्रले पनि प्रष्ट पार्दैन । बल राखेर आक्रमणमा अघि बढ्न मन पराउने उनले विपक्षी डिफेन्सलाई पटक पटक समस्या दिने गरेका छन् ।

अलमुताइरीको मागअनुसार प्रदर्शन गर्न सके जगजितको मौरिसस विरुद्ध हुने मैत्रीपूर्ण खेलका लागि राष्ट्रिय टोलीमा पर्ने प्रयास सफल हुन सक्छ । जसरी जगजितले आफ्नो करिअरले सार्थक बनाउने प्रयासको रुपमा यसलाई लिएका छन्, उनले त्यसका लागि मिहिनेत गर्नेमा दुइमत छैन । क्षमता हेर्दा अलमुताइरीको रणनीतिमा उनी फिट हुन समस्या छैन । तर प्रशिक्षणमा उनको प्रदर्शन र उक्त पोजिसनमा अन्य खेलाडीले कत्तिको चुनौती पेस गर्छन्, त्यसले पनि उनको भविष्य तय गर्नेछ ।