एजेन्सी – इन्ज्युरी समयमा दुई गोल गरेपछि सेभियाले स्पेनिस ला लिगामा रोमाञ्चक जित निकालेको छ । घरेलु मैदानमा सेभियाले ग्रानडालाई ४–२ ले पराजित गरेको हो ।

सेभियाको जितमा डिएगो कार्लाेस, लुकास ओकम्पास, राफा मिर र एलेसान्द्रो गोमेजले गोल गरे । ग्रानडाका डार्विन माचिस र भिक्टर डियाजले गोल फर्काए । रमन सान्चेज पिजवानमा शुक्रबार राति भएको खेलको २३औं मिनेटमा डार्विन माचिसको गोलबाट घरेलु टोली सेभिया पछि परेको थियो । डार्विनले लुइस स्वारेजको पासमा गोल गरेका थिए ।

तर, ग्रानडाको अग्रता लामो सम टिकेन । ३२औं मिनेटमा डिएगो कार्लाेसले जेसस नाभासको पासमा हेडर गोल गर्दै सेभियालाई खेलमा फर्काए । ६६औं मिनेटमा लुकास ओकम्पासले गोल गर्दै सेभियालाई २–१ को अग्रता दिलाए । उनले जेसस कोरोनाको पासलाई सदुपयोग गरेका थिए ।

७६औं मिनेटमा राफा मिरले गोल गरेपनि उक्त गोलले मान्यता पाएन । उक्त गोलको मुभअघि नै सेभियाका खेलाडीले ग्रानडाका खेलाडीमाथि फउल गरेको देखिएको थियो ।८८औं मिनेटमा भिक्टर डियाजले गोल गर्दै खेललाई २–२ गोलको बराबरीमा ल्याए । उनले लुइस मिल्लाको पासमा गोल गरेका थिए ।

बराबरीतर्फ धकेलिएको खेलमा त्यसपछि इन्ज्युरी समयमा राफा मिर र गोमेजले गोल गर्दै टोलीलाई रोमाञ्चक जित दिलाए । राफा मिरले इन्ज्युरी समयको थप गरिएको तेस्रो मिनेटमा तथा गोमेजले इन्ज्युरी समयको थप गरिएको नवौं मिनेटमा गोल गरे ।

यो जितसँगै सेभिया ३१ खेलबाट ६० अंक जोडेर दोस्रो स्थानमा उक्लिएको छ । सेभियाले दुई खेल कम खेलेको बार्सिलोना र एक खेल कम खेलेको एट्लेटिको म्याड्रिडलाई ३ अंकले पछि पारेको हो । सेभिया शीर्षस्थानमा रियल म्याड्रिडभन्दा ९ अंकले पछि छ । पराजित ग्रानडा २९ अंक जोडेर १६औं स्थानमा रहेको छ ।