धनगढी (हाम्रो खेलकुद) – धनगढीमा सुरु हुन लागेको प्रथम राष्ट्रिय मुख्यमन्त्री विवाइसी महिला गोल्डकप फुटबल प्रतियोगिताको तयारी पूरा भएको छ । आयोजक वनदेवी युवा क्लबले पत्रकार सम्मेलन गरी महिला गोल्डकपको तयारी पूरा भएको जनाएको हो ।

वैशाख ३ गतेदेखि १० गतेसम्म धनगढीस्थित रंगशालामा गोल्डकपको आयोजना गरिने क्लबका अध्यक्ष सुसन जोशीले बताए । सुदुरपश्चिम प्रदेश खेलकुद परिषद् मुख्य प्रवद्र्धक रहेको प्रतियोगितामा विभागीय टिमसहित ८ क्लबको सहभागिता रहेको छ ।

अध्यक्ष जोशीले गोल्डकपको विजयी टिमले ट्रफीसहित नगद ५ लाख र उपविजेताले ट्रफी सहित २ लाख ५० हजार रुपैयाँ प्राप्त गर्नेछन् ।प्रतियोगिताको प्लेयर अफ दि म्याच ५ हजार, विधागत उत्कृष्टलाई १० हजार र प्रतियोगिताको सर्वाेत्कृष्ट खेलाडीले ५० हजार रुपैयाँ हात पार्नेछन् । महिला गोल्डकप सञ्चालनका लागि करिब १ करोड रुपैयाँ खर्च लाग्ने अध्यक्ष जोशीले बताए ।

टाइसिट तथा ट्रफी सार्वजनिक
भोलीदेखि सुरु हुने महिला गोल्डकपको टाइसिट सार्वजनिक गरिएको छ । शनिबारको पहिलो खेल विभागीय टिम नेपाल पुलिस क्लब र चन्द्रपुर नगरपालिका रौतहटबीच हुने छ । यस्तै पत्रकार सम्मेलनमा ट्रफी समेत सार्वजनिक गरिएको छ ।

वनदेवी युवा क्लब तेघरी लामो समयदेखि खेलकुद क्षेत्रमा सक्रिय रहदैं आएको छ । क्लबले सुदुरपश्चिममा गोल्डकप आयोजना गर्नुअघि प्रदेशकै सर्वाधिक धनराशीको फुटबल प्रतियोगिता आयोजना गर्दै आएको थियो । प्रदेशमा आयोजना हुने विभिन्न फुटबल प्रतियोगिताहरुको उपाधि समेत जितेको छ ।