एजेन्सी – यूईएफए च्याम्पियन्स लिग अन्तर्गत सेमिफाइनल चरणको पहिलो लेगमा म्यानचेस्टर सिटीले रियल म्याड्रिडको सामना गर्दैछ । खेल मंगलबार मध्यरातको १२:४५ बजे सिटीको घरेलु मैदान इतिहाद रंगशालामा सुरु हुनेछ ।

सिटीले आफ्नो मुख्य डिफेन्डर रुबेन डियासलाई यसै साता प्रिमियर लिग अन्तर्गत वाटफर्डविरुद्ध ५-१ को जितमा चोटबाट फिर्ता पाएको छ । प्रशिक्षक पेप गुआर्डीओला अर्का डिफेन्डर काइल वाल्कर पनि यस खेलका लागि फिट रहने अपेक्षा गरिरहेका छन् । पोर्चुगिज डिफेन्डर जोआओ क्यान्सेलो भने तीन पहेंलो कार्डपछि प्रतिबन्ध पाएका कारण खेलमा हुने छैनन् ।

रियल म्याड्रिडलाई पनि खेलअघि चोटको समस्या रहेको छ । डेविड अलाबा तिघ्रामा समस्या देखिएपछि खेल्ने नखेल्ने पक्का भएको छैन । मिडफिल्डर क्यासेमिरो र डिफेन्डर फर्लान्ड मेन्डी पनि खेल्नेमा शंका रहेको छ । सबै खेलाडीको झिनो सम्भावना भने कायम छ ।

सम्भावित सुरुवाती ११ :

म्यानचेस्टर सिटी (४-३-३) : एडरसन – काइल वाल्कर, एमेरिक लापोर्ट, रुबेन डियास, ओलेक्जेन्दर जिन्चेन्को – बर्नार्डो सिल्भा, केभिन डे ब्रुएन, रोड्री – रियाद माहरेज, फिल फोडेन, रहिम स्टर्लिङ

रियल म्याड्रिड (४-३-३) : थिबाउट कोर्टुवा – ड्यानी कार्भाजल, एडर मिलिसाओ, नाचो फर्नान्डेज, मार्सेलो – टोनी क्रुस, एडुआर्डो कामाभिंगा, लुका मोड्रीच – फेडे भालभेर्डे, करीम बेन्जेमा, भिनिसियस जुनिअर

यो पनि : रियल म्याड्रिड विरुद्ध ह्याट्रिक गर्ने लक्ष्यमा प्रशिक्षक पेप