काठमाडौं (हाम्रो खेलकुद) – अखिल नेपाल फुटबल संघ (एन्फा) ले सहिद स्मारक ‘सी’ डिभिजन लिग खेलिरहेको आरसी–३२ फुटबल एकेडेमीलाई जरिवाना लगाइएको छ ।

एन्फाको अनुशासन कमिटिले ‘सी’ डिभिजन लिग अन्तर्गत पुल्चोक स्पोर्ट्स क्लबविरुद्धको खेलमा अनुशासनहीन कार्य गरेको भन्दै आरसी–३२ लाई १ लाख ५० हजार जरिवाना सुनाएको हो ।

लिग कमिटीको सिफारिसमा अनुशासन कमिटीले आरसी–३२ का खेलाडी अनिश श्रेष्ठलाई २ वर्ष तथा बिदुर रिजाल र प्रविन राईलाई १–१ वर्षको प्रतिबन्ध लगाएको छ । उनीहरुले एन्फाले आयोजना गरेको वा स्वीकृती दिएको प्रतियोगिता खेल्न पाउनेछैन ।

यस्तै एन्फाले टिम अफिसियल सन्जीव कार्की र टिम व्यवस्थापकलाई जारी सिजनको लिगका बाँकी खेलमा प्रतिबन्ध लगाएको छ । अफिसियल रविन चन्दलाई एक वर्षको प्रतिबन्ध लगाइएको छ । एकेडेमीका सञ्चालक रविन सुर्खेत जिल्ला फुटबल संघको नवनिर्वाचित अध्यक्ष समेत हुन् । उनी अन्तर्राष्ट्रिय फुटबलर रोहित चन्दका दाइ हुन् ।

लिग अन्तर्गत गत आइतबार एन्फा कम्प्लेक्समा भएको पुल्चोक स्पोर्ट्स क्लबविरुद्धको खेलपछि आरसी ३२ का खेलाडी र अफिसियलले खेलपछि भीआईपी एरियामा गएर म्याच रेफ्री र अफिसियलविरुद्ध हातपातमा गरेको एन्फाले जनाएको छ ।

यस्तै अनुशासन कमिटीले बी डिभिजन लिगमा बाँसबारी क्लबविरुद्ध अनुशासनहिन काम गरेको श्री भगवती क्लबको जरिवाना बढाएको छ । अब श्री भगवतीले १ लाख जरिवना बुझाउनुपर्नेछ ।

बाँसबारी क्लबसँग २–१ ले पराजित भएपछि श्री भगवतीका पदाधिकारीहरु पिचतिर दौडेर म्याच रेफ्री सुमन श्रेष्ठ र अफिसियललाई हातपात गरेका थिए । क्लबका पदाधिकारी राजाराम श्रेष्ठ र विक्रम डंगोललाई एक वर्षको प्रतिबन्ध लगाइएको छ ।

खेलाडी अनिश श्रेष्ठलाई पनि चैत २४ गतेदेखि लागु हुने गरी एक वर्षको प्रतिबन्ध लगाइएको छ । लिग कमिटीले क्लबलाई यसअघि ५० हजार जरिवाना गरेको थियो भने श्रेष्ठ र डंगोललाई क्लबका बाँकी खेल खेल्न नपाउने गरी प्रतिबन्ध लगाएको थियो ।

यसैगरी बैठकले गत चैत २६ गते मध्यपुरविरुद्ध भएको घटनामा नयाँबस्ती युथ क्लबलाई लगाएको ३ लाख रुपैयाँको जरिवाना घटाएर १ लाख ५० हजार रुपैयाँ तोकेको छ ।

यस्तै नयाँबस्ती क्लबका प्रशिक्षक विकास राईलाई ६ महिना र खेलाडी मनोज राईलाई एक वर्ष प्रतिबन्ध लगाउने लिग समितिको निर्णयलाई यथावत राखेको छ । क्लबका पदाधिकारी श्रीबहादुर योगीलाई दुई वर्षको तथा व्यवस्थापक विकास राईलाई एक वर्षको निलम्बन गरिएको छ ।