एजेन्सी – ब्राजिलियन विंगर एन्टोनी माथिअसलाई अनुबन्ध गर्नका लागि इंग्लिस क्लब म्यानचेस्टर युनाइटेड र डच क्लब आयाक्सबीच सहमति भएको छ । युनाइटेडले ८० मिलियन पाउण्ड खर्चेर एन्टोनी अनुबन्ध गर्न लागेको हो ।

लामो समयदेखि युनाइटेडले एन्टोनी अनुबन्ध गर्ने प्रयास गरेपनि दुई क्लबबीच सहमति हुन सकेको थिएन । एन्टोनी आफैंले पनि युनाइटेड जाने इच्छा जाहेर गरेका थिए । पटक पटकको छलफलपछि दुई क्लबबीच ट्रान्सफर रकममा सहमति भएपछि एन्टोनी युनाइटेड जाने भएका हुन् । युनाइटेडले सुरुवातमा ८०.७५ मिलियन र त्यसपछि प्रदर्शनका आधारमा ४.२५ मिलियन पाउण्ड तिर्नेछ ।

२२ वर्षीय ब्राजिलियन विंगर युनाइटेडले अनुबन्ध गरेको दोस्रो महँगो खेलाडी बनेका छन् । युनाइटेडले यसअघि डिफेन्डर ह्यारी मगाएर अनुबन्ध गर्न पनि ८० मिलियन खर्चेको थियो । मिडफिल्डर पल पोग्बा ८९ मिलियन पाउण्डसहित महँगा खेलाडी रहेका छन् ।

आयाक्सका लागि ८२ खेलमा २५ गोल र २२ असिस्ट प्रदान गरेका एन्टोनी राइट विंगमा खेल्छन् । युनाइटेडमा जेडन सान्चो पनि सोहि पोजिसनमा खेल्दै आएका छन् । सन् २०२१ अक्टोबरमा ब्राजिलको राष्ट्रिय टोलीबाट डेब्यु गरेका एन्टोनीले ९ खेलमा २ गोल गरेका छन् ।

युनाइटेडले यस ट्रान्सफर विन्डोमा चार खेलाडी अनुबन्ध गरिसकेको छ । आयाक्सकै डिफेन्डर लिसान्ड्रो मार्टिनेज, फेयनुर्डका टिरेल मालासिया, रियल म्याड्रिडबाट मिडफिल्डर कासेमिरो र फ्री ट्रान्सफरमा क्रिस्टियन एरिक्सन युनाइटेडमा अनुबन्धित भइसकेका छन् ।