काठमाडौं (हाम्रो खेलकुद) – नेपाली राष्ट्रिय फुटबल टोलीका प्रशिक्षक अब्दुल्लाह अलमुताइरीले नियम तोड्दा अखिल नेपाल फुटबल संघ (एन्फा) लाई एसियाली फुटबल महासंघ (एएफसी) ले मोटो जरिवाना तिराउने भएको छ । एकै खेलको दुई फरक घटनामा एन्फा कुल ७ हजार अमेरिकी डलर (झन्डै ९ लाख) जरिवानामा परेको हो ।

एएफसीको अनुशासन समितिले १४ जुन २०२२ मा एएफसी एसियन कप २०२३ छनोट अन्तर्गत नेपाल र इन्डोनेसियाबीच खेलमा भएको दुई फरक घटनालाई लिएर कारवाही गर्ने निर्णय लिएको हो ।

एएफसीको अनुशासन समितिको बैठकले इन्डोनेसियाविरुद्ध खेलमा प्रशिक्षक अब्दुल्लाह अलमुताइरी निलम्बनमा रहेपनि खेलअघि टिमको ड्रेसिङ रुममा प्रवेश गरेको र अन्य व्यक्तिको एक्रेडीटेसन कार्ड प्रयोग गरि खेलपछि मैदान प्रवेश गरेको भन्दै एएफसीले ६ हजार अमेरिकी डलर जरिवाना गराएको छ । यसमा एन्फाले १ हजार ५ सय अमेरिकी डलर ९० दिन भित्र तिर्नुपर्ने छ । बाँकी ४ हजार ५ सय डलर भने दुई वर्षका लागि निलम्बन गरिएको छ । यदि दुई वर्षको अन्तरालमा यस्तै घटना दोहोरिए एएफसीले पूरा रकमका साथसाथै नयाँ घटनाको लागि बेग्लै जरिवाना तिराउने उल्लेख गरेको छ ।

निलम्बित अलमुताइरी ड्रेसिङ रुममा भेटिएको उक्त खेलमा नेपाली टोली ढिलो गरि मैदान प्रवेश गर्दा खेल ढिलो सुरु भएपछि थप १ हजार अमेरिकी डलर जरिवाना गरेको हो । एएफसीले उक्त घटनामा हाललाई २ सय ५० अमेरिकी डलर ९० दिनभित्र तिर्न भनेको छ । बाँकी ७ सय ५० डलर भने दुई वर्षका लागि निलम्बन गरिएको छ । यदि दुई वर्षको अन्तरालमा यस्तै घटना दोहोरिए एएफसीले पूरा रकमका साथसाथै नयाँ घटनाको लागि बेग्लै जरिवाना तिराउने उल्लेख गरेको छ ।

दुवै घटनामा एएफसीले एन्फालाई चेतावनी दिँदै घटना दोहोरिए थप कडा कारवाही हुने उल्लेख गरेको छ । प्रशिक्षक अलमुताइरी उक्त खेलका दौरान भने दर्शक दिर्घामा रहेका थिए । पछिल्ला खेलमा पाएको पहेंलो कार्डका कारण उनी निलम्बनमा रहेका थिए । इन्डोनेसियाविरुद्ध डिफेन्डर सुमन अर्यालले रातो कार्ड खाएपछि दुवै दर्शक दीर्घामा सँगै बसेका थिए ।

एएफसीको अनुशासन समितिले नाम नखुलाएपनि एन्फा प्रवक्ता सुरेश शाहले उक्त घटनामा प्रशिक्षक अलमुताइरीको गल्ति भएको पुष्टि गरे । ‘एसियन कप छनोटको समयमा भएको घटना हो । प्रशिक्षक अलमुताइरीको गल्ती भएको थाहा पाएका छौं । जरिवानाबारे एएफसीले पत्राचार गरेको छ । अब तोकिएअनुसार जरिवाना केही समयमा तिर्नेछौं,’ शाहले हाम्रो खेलकुदसँग भने ।

प्रशिक्षक अलमुताइरी पछिल्लो समय भने नेपाली टोलीसँग छैनन् । एन्फाले उनी बिरामी बिदामा रहेको भन्दै कार्यवाहक प्रशिक्षकको रुपमा प्रदिप हुमागाईलाई नियुक्त गरेको छ । नेपालले अन्तर्राष्ट्रिय मैत्रीपूर्ण खेलमा असोज ११ गते बंगलादेशको सामना गर्दैछ ।

यो पनि पढ्नुहोस : प्रशिक्षक हुमागाईको झुट र एन्फाको लाचार निर्णय