एजेन्सी – इंग्लिस क्लब चेल्सीले क्याटलान क्लब बार्सिलोनाबाट फरवार्ड पिएरे एमरिक औवामियाङलाई अनुबन्ध गरेको छ ।

चेल्सीले गावोनका फरवार्ड औवामियाङलाई दुई वर्षको लागि १० मिलियन पाउन्डमा क्लबमा अनुबन्ध गर्न सफल भएको हो । उनले चेल्सीमा ९ नम्वर जर्सी लगाउनेछन् ।

३३ वर्षीय औवामियाङ एक सिजन पछि नै प्रिमियर लिग क्लबमा फर्किएका हुन् । औवामियाङ गत सिजनको विन्टरमा फ्रि ट्रान्सफरमा सन् २०२५ सम्मका लागि बार्सिलोनामा आबद्ध भएका थिए ।

तर, यो समरमा बार्सिलोनाले रोबर्ट लेवान्डोस्की र राफिन्हा भित्र्याएपछि उनी आफ्नो सम्झौता बाँकी छँदै क्लब छाडेर चेल्सी पुगेका हुन् । बार्सिलोनामा लेवान्डोस्कीसँगै औसमाने डेम्वेले, मेम्फिस डिपाए, फेरान टोरेस र अन्सु फाती रहेका छन् ।

औवामियाङले बार्सिलोनाका लागि गत सिजन २३ खेलमा १३ गोल गरेका छन् । यो सिजन उनले एक खेल खेलेका छन् ।
इटालियन क्लब एसी मिलानबाट व्यवसायिक खेल करिअर सुरु गरेका औवामियाङले २००८ देखि २०१३ सम्म फ्रान्सको विभिन्न क्लबमा खेलेका थिए ।

त्यसपछि २०१३ देखि २०१८ सम्म जर्मन क्लब बोरुसिया डर्टमुन्डबाट खेल्दै सबैको ध्यान खिच्न सफल भएका थिए । त्यसपछि उनी लन्डन क्लब आर्सनल पुगेका थिए । औवामियाङले आर्सनलमा २०१८ देखि २०२२ सम्म १ सय ६३ खेलमा ९२ गोल गरेका छन् ।

फ्रान्सको यु–२१ टोलीबाट खेलिसकेका औवामियाङले त्यसपछि गावोन रोजेका थिए । २००९ देखि गावोनको सिनियर टोलीमा रहेका उनले ७२ खेलमा ३० अन्तर्राष्ट्रिय गोल गरेका छन् ।

यस्तै चेल्सीले स्वीस मिडफिल्डर डेनिस जाकारियालाई इटालियन क्लब युभेन्ट्सबाट एक सिजनको लागि लोनमा अनुबन्ध गर्न सफल भएको छ ।