काठमाडौं (हाम्रो खेलकुद) – मिडफिल्डर दीपा शाही र फरवार्ड अमिशा कार्कीले सिनियर महिला राष्ट्रिय टोलीमा डेब्यु गरेका छन् ।

छैटौं संस्करणको महिला साफ च्याम्पियनसिप अन्तर्गत भुटानसँगको उद्घाटन खेलमा प्रशिक्षक कुमार थापाले दीपा र अमिशालाई पहिलो रोजाईमा मौका दिदै डेब्यु दिएका हुन् ।

दीपाले कन्काई नगरपालिकाबाट उपमेयर कप प्रतियोगिता पछि चर्चा चुलिएको थियो । त्यो प्रतियोगिताकै उनी उत्कृष्ट खेलाडी भइन् । त्यसलगतै उनले यू–१८ र यू–१९ राष्ट्रिय टिमबाट साफ च्याम्पियनसिप पनि खेलिन् । त्यसपछि उनी विभागीय टिम आर्मीमा करारमा आबद्ध भएकी छिन् ।

यता, अमिशाले पनि महिला राष्ट्रिय लिग र उपमेयर कप छनोट प्रतियोगितामा उच्च प्रदर्शन गरेपछि उनले राष्ट्रिय टोलीसम्मको यात्रा तय गर्न सफल भएकी हुन् । उनले उमेर समूहमा पनि खेलेकी छिन् ।

प्रशिक्षक कुमार थापाले गोलरक्षकमा कप्तान एन्जिला तुम्बापो सुब्बालाई उतारेका छन् । सेन्टर डिफेन्समा गीता राना र पुनम जर्घा मगर खेल्दा साइड डिफेन्समा अमृता जैशी र हिरा भुजेल रहेका छन् । सेन्टर मिडफिल्डमा दीपा शाहीले डेब्यु गर्दा उनलाई सरु लिम्बुले साथ दिनेछिन् ।

विंगमा अनिता केसी र अनिता बस्नेतले खेल्नेछन् । आक्रमणको जिम्मेवारी सावित्रा भण्डारीले सम्हाल्नेछिन् । उनलाई अमिशा कार्कीले साथ दिनछिन् ।

यो पनि पढ्नुहोस : डेब्युमै दिपाको लोभलाग्दो प्रभाव