काठमाडौं (हाम्रो खेलकुद) – नेपाली महिला राष्ट्रिय फुटबल टोलीले साफ महिला च्याम्पियनसिप अन्तर्गत उद्घाटन खेलमा भुटानलाई ४-० ले पराजित गर्यो । टोलीका प्रशिक्षक कुमार थापाले खेलको सुरुवातमा वर्षा हुँदा सोचेजस्तो समयमा गोल निकाल्न नसकेको बताए ।

खेलपछि पत्रकार सम्मेलनमा बोल्दै प्रशिक्षक थापाले वर्षाका कारण मैदान भारी हुँदा आफ्नो योजना अनुसार खेल्न नसकेको बताए । ‘हामीले मौसम र खेलको स्कोर अनुमान गर्न सक्दैनौं । पहिलो हाफमा वर्षाका कारण सोचेजस्तो प्रदर्शन हुन सकेन । दोस्रो हाफमा भने वर्षा रोकिएपछि राम्रो प्रदर्शन गर्यौं । मैदान भिजेपनि बल पोसेसन भने हाम्रै पकडमा थियो । हामीले वैकल्पिक खेलाडीको पनि प्रयोग गरेर समग्रमा राम्रो खेल्यौं,’ उनले भने ।

‘गोल समयमा नआउनु समस्या थियो । तर हामीले मैदान आउनुभन्दा केही घण्टा अघिमात्र टोलीमा परिवर्तन गर्नुपर्यो । मन्जलीलाई ज्वरो आएपछि अनिता केसीलाई उनको स्थानमा ल्यायौं । प्रशिक्षणमा हामीले सेट टिम बनाएका थियौं, तर आज आकस्मिक परिवर्तन गरेपनि राम्रो प्रदर्शन भयो,’ थापाले भने,’ सेन्टर मिडफिल्डमा दीपाले डेब्युमा राम्रो प्रदर्शन गरिन् । पहिलो पटक सँगै खेलेपनि दीपा र सरुको कम्बिनेसन मिलेको थियो ।’

प्रशिक्षक थापाले साना गल्ती भएपनि समग्रमा प्रदर्शनबाट सन्तुष्ट रहेको बताए । ‘साना गल्ती भइरहेका छन् । आउने खेलमा सुधार गर्दै अघि बढ्नेछौं । टोलीको प्रदर्शनबाट खुसी छु,’ उनले थपे, ‘मलाई लाग्छ हामीले गरेको ७ साताको प्रशिक्षण पर्याप्त थियो । हामीले बनाएको योजना अनुसार नै दोस्रो हाफमा खेलेका हौं । हामीले आउने खेलमा पनि योजना परिवर्तन गर्दैनौं । खेलाडी परिवर्तन भएपनि हामी यसै शैलीमा खेल्छौं ।’

डेब्यु गरेकी अमिशालाई पहिलो हाफमै परिवर्तन गरेपनि उनको प्रयास प्रशंसनीय रहेको थापाले बताए । ‘अमिशाको पहिलो खेल थियो । उनले आफ्नो तर्फबाट राम्रो प्रयास गरिन् । मैदानको अवस्थाले केही असर गरेको हो,’ उनले भने, ‘समिक्षाले पनि डिफेन्समा राम्रो खेलिन् । उनलाई ब्याक फोरमा दिएको जिम्मेवारी पूरा गरिन् ।’

प्रशिक्षक थापाले भुटान दोस्रो हाफमा रक्षात्मक भएपछि नेपाललाई सहज भएको बताए । ‘भुटानले पहिलो हाफमा निकै कडा चुनौती दियो । दोस्रो हाफमा रक्षात्मक खेल्न थालेपछि हामीलाई सहज भयो । उनीहरुले राम्रो प्रदर्शन गरे,’ उनले भने ।

प्रशिक्षक थापाले वर्षाका कारण दर्शकदिर्घामा समर्थक कम भएको पनि बताए । ‘आज वर्षाका कारण समर्थकहरु आउन कठिन भएको होला । आशा छ अर्को खेलमा दर्शक दिर्घा भरिनेछ,’ उनले हाँस्दै भने ।

यो पनि : सावित्रा र अनिता चम्कँदा नेपालको विजयी सुरुवात