काठमाडौं (हाम्रो खेलकुद) – फाइनलमा भारतसँग पराजित भएपछि नेपाल साफ यू-१७ च्याम्पियनसिपको उपविजेता बनेको छ । बुधबार श्रीलंकाको कोलोम्बोमा भएको फाइनल खेलमा नेपाल भारतसँग ४-० ले पराजित भएको हो ।

फाइनलको आधा भन्दा बढी समय १० खेलाडीमा सिमित नेपालले समूह चरणमा भारतलाई हराएको प्रदर्शन दोहोर्याउन सकेन । पहिलो हाफको ३० मिनेट नबित्दै नेपाल २-० ले पछि परेको थियो । भारतले १७ औं मिनेटमा बबी सिंहको गोलमा अग्रता लिएको थियो । कौरोउ सिंहले ३० औं मिनेटमा अग्रता दोब्बर पारे ।

नेपालका कप्तान प्रशान्त लक्षमले ३८ औं मिनेटमा रातो कार्ड पाए । बल खोस्ने क्रममा उनीमाथि भारतीय खेलाडी लडेर ढाड ठोक्किन पुग्दा रेफ्रीले सिधै रातो कार्ड देखाएका थिए । प्रशान्तले आफ्नो कुनै गल्ती नभएको बताएपनि रेफ्री आफ्नो निर्णयमा अडिग रहे ।

दोस्रो हाफको ६३ औं मिनेटमा वानलालपेका गुइतेले भारतलाई ३-० ले अघि बढाए । इन्ज्युरी समयमा अमनले गोल गरेपछि भारत ४-० को जित दर्ता गर्दै उपाधि जित्न सफल रहयो । भारतले यसअघि समूह चरणमा नेपालसँग ३-१ को हार बेहोरेको थियो ।

नेपालले समूह चरणको पहिलो खेलमा भुटानलाई ३-१ ले हराएको थियो । भारतलाई हराएपछि समूह विजेता बनेको नेपाल सेमिफाइनलमा आयोजक श्रीलंकाविरुद्ध उत्रिएको थियो । सोमबार भएको सेमिफाइनलमा श्रीलंकामाथि ६-० को जित दर्ता गर्दै नेपालले उपाधि भिडन्तमा स्थान पक्का गरेको थियो ।