स्याङ्जा (हाम्रो खेलकुद) – नवौं राष्ट्रिय खेलकुद प्रतियोगिता अन्तरगत महिला फुटबलको दोस्रो खेलमा बिभागीय टोली त्रिभुवन आर्मी क्लबले सहज जित निकालेको छ ।

स्याङजाको वालिङस्थित मालेबगर खेल मैदानमा भएको खेलमा आर्मीले मधेश प्रदेशलाई ६–० को फराकिलो अन्तरले पराजित गरेको हो ।

आर्मीको जितमा इन्दिरा राईले दुई तथा चन्द्रा भण्डारी, कुसुम खतिवडा, अमिसा कार्की र हिमा चौधरीले समान एक गोल गरिन् ।

खेलको नवौं मिनेटमा इन्दिराको गोलबाट आर्मीले अग्रता लिएको थियो । पहिलो हाफको इन्ज्युरी समयको दोस्रो मिनेटमा इन्दिराले व्यक्तिगत तथा टोलीको लागि दोस्रो गोल गर्दै अग्रता दोब्बर पारिन् ।

५२औ मिनेटमा चन्द्रा भण्डारीले गोल गर्दै ३–० को स्थितिमा पु¥याइन् । ५५औं मिनेटमा कुसुम खतिवडाले गोल गर्दै टोलीलाई ४–० ले अघि बढाइन् । ५७औं मिनेटमा अमिसा कार्कीले मैदानको मध्य भागबाट एक्लै गोलकिपरलाई विट गर्दै गोल गर्न सफल भइन् ।

हिमा चौधरीले खेलको अन्तिमतिर गोल थप्दै आर्मीको जित पक्का गरिन् । प्रतियोगिताको पहिलो खेलमा वागमतिलाई ५–० गोल अन्तरले पराजित गर्दै नेपाल पुलिस क्लब विजयी भएको थियो । महिला फुटबलमा सात प्रदेश र तीन बिभागिय टोलीको सहभागीता रहेको छ ।