सुबास हुमागाईं, काठमाडौं

नेपालले सन् २०२२ मा साफ यू१५ च्याम्पियनसिप जित्दा सुक्रिया मियाले आक्रमणमा राम्रो प्रभाव जमाएकी थिइन् । महिला फुटबलमा नेपालले बिरलै पाउने सफलताको सारथी बनेकी सुक्रियाले त्यसयता यू१७ उमेर समूह हुँदै घरेलु फुटबलको सिनियर टोलीमा नै खेलेकी छिन् । जारी महिला राष्ट्रिय लिगमा वालिङको आक्रमण सम्हालिरहेकी सुक्रिया आफ्नो दिदीले अपुरो छोडेको सपना पूरा गर्न लागिरहेकी छिन् ।

१६ वर्षीय सुक्रियाकी दिदी नुरियाले पनि नेपालको उमेर समूहको राष्ट्रिय टोलीबाट खेलिन् । हाल सिनियर टोलीमा प्रभाव जमाइरहेकी प्रिती राईसँग मिडफिल्ड खेल्ने नुरियाले उमेर समूहबाट सिनियर टोलीको यात्रा तय गर्न सकिनन् । एक त खेल दौरानको चोट, त्यसमा परिवारबाट बलियो सहयोग नहुनु र स्थानीय रुपमा पुनरागमनको लागि बलियो साथ नपाउँदा दिदी नुरियाले आफ्नो करिअर अघि बढाउन पाइनन् । बहिनी सुक्रियालाई निस्फिक्री खेल्न दिनकै लागि पनि उनले परिवार र समाजसँग लगातार लडिन् ।

मुस्लिम समुदायबाट उमेर समूहको राष्ट्रिय टोलीमा खेल्ने पहिलो खेलाडी बनेकोमा अहिले २१ वर्ष पुगेकी नुरियालाई गर्व लाग्छ । उनले सन् २०१७ मा भुटानमा सम्पन्न साफ यू-१५ च्याम्पियनसिप लगायत ३ प्रतियोगिता खेलेकी थिइन् ।

‘मलाई एकदम गर्व लाग्छ कि म मुस्लिम समुदायबाट उमेर समूहको राष्ट्रिय टोलीमा खेल्ने पहिलो महिला खेलाडी बने । लक्ष्य त मेरो सिनियर टोलीबाट खेल्ने थियो, तर त्यो पूरा भएन । अब बहिनीले त्यो पूरा गर्छिन् भन्ने विश्वास छ । उसले खेलेपनि मैले खेले बराबर हुन्छ,’ नुरियाले एन्फा कम्प्लेक्स परिसरमा सुनाइन् ।

सुक्रियाले खेल्न थालेको मुस्किलले ५ वर्ष हुँदैछ । र उनले खेलमा लाग्नुको कारण पनि दिदी नै हुन् । एक प्रतियोगिताका लागि दिदी नुरिया छनोट हुन नसक्दा घर आएर निकै रोइन् । बहिनी सुक्रियाले यो देखेपछि मन थाम्न सकिनन् र उनको सपना आफूले पुरा गर्ने भन्दै इख राखिन् । त्यसअघि रमाइलोको लागि फुटबल खेल्ने सुक्रियाले अब भने फुटबलमै केही गर्ने अठोट लिइन् ।

दिदी नुरिया आफ्नो तुलनामा बहिनीसँग उचाइ राम्रो रहेको र खेल्ने शैली पनि प्रभावशाली रहेको बताउँछिन् । ‘मलाई त उचाइले पनि साथ दिएन । उमेर समूहमा त खेलेको थिएँ, पछि सिनियर स्तरमा जान प्रशिक्षकले पत्याउनु भएन भनौं होला । के भयो भयो । अब त मैले आशा पनि मारिसकें, बहिनीले खेलेको हेरेर चित्त बुझाउँछु,’ नुरियाले सुनाइन् ।

सुक्रियाले नुरिया उमेर समूहबाट खेलेको देख्न त पाइनन् तर दिदीले राम्रो मिडफिल्ड खेलेको भन्ने सुनेकी थिइन् । दिदीले खेलाडी बन्न गरेको संघर्षले आफूलाई निकै सहज भएको उनले बुझेकी छिन् ।

‘मलाई त खेलमा आउन गाह्रो भएन । दिदी पहिलो मुस्लिम खेलाडी भएकाले मेरो बाटो सहज भयो । दिदीको समयमा बुवाले खेल्न नदिँदा गाह्रो भएको थियो । तर दिदीले म खेल्छु भनेपछि निकै सहयोग गर्नुभयो । परिवारले पनि अहिले साथ दिनुभएको छ । आमा, दाई दिदि सबैले खेल्न प्रोत्साहन गर्नुहुन्छ,’ सुक्रियाले सुनाइन् ।

दुई वर्षअघि साफ यू१५ को उपाधि जितेर फर्केपछि आफ्नो ममीलाई मेडल लगाउँदा गर्व लागेको सुक्रियाले बताइन् । उमेर समूहबाट सिनियर फुटबलमा आउँदा आफ्नो खेल पनि सुधारिएको उनले महसुस गरेकी छिन् । पछिल्लो दुई खेल अस्वस्थताका कारण पूरा खेल्न नपाएकी सुक्रिया महिला लिगको अवसरलाई सदुपयोग गर्ने लक्ष्य राखेकी छिन् ।

‘अहिलेलाई लक्ष्य भनेको वालिङलाई दोस्रो चरणमा पुर्याउने हो । त्यसका लागि निकै मिहिनेत गरिरहेका छौं । उमेर समूहबाट सिनियर फुटबल आउँदा खेल्न कठिन हुने रहेछ । तर यो अवसरलाई सक्दो सदुपयोग गर्न प्रयास गरिरहेको छु,’ कर्णालीविरुद्ध जितमा १ गोल र १ असिस्ट गरेकी युवा फरवार्डले सुनाइन् ।

हालसम्म आधिकारिक प्रतियोगितामा दुई दिदीबहिनीले सँगै खेलेका छैनन् । तर लिगको तयारीका दौरान एकसाथ प्रशिक्षण गर्दाको अनुभवले सुक्रिया सहज हुने बताउँछिन् । ‘हामी दुईले एकसाथ प्रतियोगिता त खेलेका छैनौं । तर लिगको तयारीको समयमा वालिङमै प्रशिक्षण गरेका थियौं । दिदी मिडफिल्ड खेल्ने म आक्रमणमा खेल्ने, राम्रो समन्वय रहेको थियो । मलाई त सहज नै हुन्छ,’ सुक्रियाले सुनाइन् ।

दिदी नुरियाले भने अब फुटबलबाहेकको विकल्प हेर्न थालिसकेकी छिन् । स्थानीय टोलीमा प्रशिक्षकले विश्वास नगरेपछि उनले अन्य टोलीबाट खेल्ने सोच बनाएकी छैनन् । विदेश जाने सोच बनाएकी उनको अहिलेको दैनिकी बहिनीलाई लिगका दौरान सहज होस् भन्ने नै छ ।

‘मैले आफू त अब के गर्न प्रष्ट छैन । खेल्न पाए त खेल्छु भनेको हो, तर मिलेको छैन । अब सुकुकै खेल हेरेर चित्त बुझाउँछु । मलाई उसले एपिएफबाट खेलेको हेर्न मन छ । त्यसपछि राष्ट्रिय टोली त सपना नै भयो,’ नुरियाले सुनाइन् ।

राष्ट्रिय टोलीकी फरवार्ड सावित्रा भण्डारीले पनि सुक्रियाको खेल देखेर मनोबल बढाउने गरेको नुरियाले सुनाइन् । ‘बहिनीको खेल देखेर साम्बा दिदीले पनि कुरा गर्नुहुन्छ । राम्रो खेल्नुपर्छ भने मनोबल पनि बढाउनुहुन्छ । वहाँजस्तै एपिएफ हुँदै राष्ट्रिय टोलीमा सँगै खेलेको हेर्न मन छ,’ नुरियाले सुनाइन् ।