एजेन्सी – आर्सनलसँग इंग्लिस प्रिमियर लिगमा आइतवार म्यानचेस्टर सिटी स्तब्ध भएको छ।

सिटीलाई‌ ५-१ ले हराउँदै आर्सनलले शीर्ष स्थानको लिभरपुलको सँगको दूरीलाई पुनः घटाएको छ।

आर्सनललाई जित दिलाउन मार्टिन ओडेगाेर्ड, थोमस पार्टे, मेल्स लेविस स्केली, काई हार्भेट्ज, इथान नोनेरीले गोल गरे। सिटीका एर्लिङ हालान्डले गोल गरे।

ओडेगार्डले दोस्रो मिनेटमा नै गोल गरे। ५५ औं मिनेटमा हालान्डले बराबरी गोल गर्दैै सिटीलाई खेलमा फर्काए। तर त्यसको एक मिनेटमै पार्टेले गोल गर्दैै आर्सनललाई अघि बढाए। त्यसपछि सिटी सम्हालिन सकेन ।

स्केलीले ६२ औं मिनेटमा गोल गरे। आर्सनलका लागि सिनियर लेभलमा यो उनको पहिलो गोल हो। ७६ औं मिनेटमा हार्भेट्ज र इन्ज्युरी समयको तेस्रो मिनेटमा नोनेरीले गोल गरेपछि आर्सनलको जित सहज बन्यो ।

२४ खेलमा दोस्रो स्थानको आर्सनलको ५० अंक छ । एक खेल कम खेलेको लिभरपुलको ५६ अंक छ। सिटी ४१ अंकसहित चौथो स्थानमा छ। सोमवार वेस्ट ह्यामलाई हराउन सके चेल्सी चौथो स्थानमा उक्लनेछ ।

युनाइटेडको अर्को हार, टोटेनहम विजयी

म्यानचेस्टर युनाइटेडले लिगमा अर्को हार बेहोरेको छ।
युनाइटेड आइतवार घरेलु मैदान ओल्ड ट्राफोर्डमा क्रिस्टल प्यालेससँग २-० ले पराजित भएको हो ।

प्यालेसलाई जित दिलाउन दुवै गोल जिन फिलिप माटेटाले गरे। माटेटाले पहिलो गोल ६४ औं मिनेट र दोस्रो गोल खेल सकिन १ मिनेट बाँकी रहँदा गरे ।

अर्को खेलमा टोटेनहमले बेन्टफोर्डलाई २-० ले हराएको छ। जारी लिगमा आठौं खेलमा टोटेनहमको यो पहिलो जित हो।

३० अंकसहित प्यालेस १२ औं स्थानमा छ। युनाइटेड पुन: १३औं स्थानमा झरेको छ। २४ खेलमा टोलीको २९ अंक छ। टोटेनहम २७ अंकसहित १४ औं स्थानमा छ। ३१ अंकसहित बेन्टफोर्ड ११ औं स्थानमा छ।