डुरान्ड कप- आर्मी समूह चरणको अन्तिम खेल खेल्दै

काठमाडौं (हाम्रो खेलकुद) – नेपालको त्रिभुवन आर्मी फुटबल क्लबले भारतमा जारी डुरान्ड कपमा‌ आज लिग चरण आफ्नो तेस्रो तथा अन्तिम खेल खेल्दैछ।

समूह ‘सी’ मा रहेको आर्मीले इण्डियन आर्मी फुटबल टिमको सामना गर्दैछ । जेआरडि स्पोर्टस कम्प्लेक्स, जमशेदपुरमा हुने खेल दिउँसो ४ः१५ बजे सुरु हुनेछ ।

इण्डियन आर्मीको यो दोस्रो खेल हो । पहिलो खेलमा उसले जमशेदपुर फुटबल क्लबसँग हार बेहोरेको थियो । अंक बिहिन इण्डियन आर्मी समूह ‘सी’ को पुछारमा रहेको छ ।

पहिलो खेलमा जमशेदपुरसँग ३-२ ले पराजित भएको आर्मीले दोस्रो खेलमा लद्दाख फुटबल क्लबसँग १-१ को बराबरी खेलेको थियो ।

त्रिभुवन आर्मी क्लब २ खेलमा १ अंकका साथ तालिकाको तेस्रो स्थानमा छ । २ खेलमा शतप्रतिशत जितको नतिजाका साथ जमशेदपुर समूहको शीर्ष स्थानमा छ ।

२४ टोलीको सहभागिता रहेको प्रतियोगिताको हरेक समूहको विजेताले नकआउट चरणमा पुग्नेछ । ६ समूहका उत्कृष्ट दुई उपविजेता पनि क्वाटरफाइनलमा प्रवेश गर्नेछन् ।

प्रतियोगिताको सबै खेलको प्रत्यक्ष प्रसारण सोनी स्पोर्टस २ र सोनी लिभले गरिरहेको छ ।

Latest News