काठमाडौं (हाम्रो खेलकुद) – त्रिभुवन आर्मी फुटबल क्लब भारतमा जारी डुरान्ड कपको समूह चरणबाटै बाहिरिएको छ ।

जमशेदपुरस्थित जेआरडी स्पोर्टस कम्प्लेक्स मंगलवार इण्डियन आर्मी फुटबल टिमसँग १-० ले पराजित भएसँगै आर्मी प्रतियोगिताबाट बाहिरिएको हो ।

इण्डियन आर्मीको जितमा क्रिस्टोले २१औं मिनेटमा गरेको गोल नै निर्णायक साबित भयो ।

त्रिभुवन आर्मी पहिलो हाफबाटै १० खेलाडीमा सिमित भएको थियो । आर्मीका गोल रक्षक विकेश कुथु २९औं मिनेटमा रातो कार्डको सामना गर्दै मैदान बाहिरिएका थिए ।

समूह ‘सी’ मा आर्मीले ३ मध्ये २ मा हार र अर्कोमा बराबरी खेलेको थियो। पहिलो खेलमा जमशेदपुर फुटबल क्लबसँग ३-२ ले पराजित भएको आर्मीले दोस्रो खेलमा लद्दाख फुटबल क्लबसँग १-१ को बराबरी खेलेको थियो ।

इण्डियन आर्मीको दोस्रो खेलमा यो पहिलो जित हो । इण्डियन आर्मीले पहिलो खेलमा जमशेदपुरसँग हार बेहोरेको थियो । ३ अंकका साथ इण्डियन आर्मी समूह ‘सी’ को दोस्रो स्थानमा उक्लिएको छ ।

त्रिभुवन आर्मी क्लबले ३ खेलमा १ अंकका साथ प्रतियोगिता सकायो । २ खेलमा शतप्रतिशत जितको नतिजाका साथ जमशेदपुर समूहको शीर्ष स्थानमा छ ।

२४ टोलीको सहभागिता रहेको प्रतियोगिताको हरेक समूहको विजेताले नकआउट चरणमा पुग्नेछ । ६ समूहका उत्कृष्ट दुई उपविजेता पनि क्वाटरफाइनलमा प्रवेश गर्नेछन् ।

प्रतियोगिताको सबै खेलको प्रत्यक्ष प्रसारण सोनी स्पोर्टस २ र सोनी लिभले गरिरहेको छ ।