काठमाडौं (हाम्रो खेलकुद)- यो वर्ष सहिद स्मारक ए डिभिजन लिग भएको खण्डमा राष्ट्रिय टोलीका कम्तिमा ८ खेलाडीलाई देख्न पाइने छैन।

बिहिवारसम्म ८ खेलाडीले यो सिजन बंगलादेशको शीर्ष डिभिजनको लिग खेल्ने पक्का भएको छ। राष्ट्रिय टोलीका फरवार्ड अन्जन विष्ट, मिडफिल्डर एरिक बिष्ट, डिफेन्डरद्वय सनिश श्रेष्ठ र योगेश गुरुङ बंगलादेशको ब्रदर्श युनियनमा आबद्ध भएका छन्।

राष्ट्रिय टोलीका लागि सर्वाधिक १३ गोल गर्ने मध्येका एक अन्जन हाल भारतको रियल कश्मीरबाट डुरान्ड कप खेलिरहेका छन् । एरिक,सनिश र योगेश राष्ट्रिय टोलीको प्रशिक्षणमा छन् । नेपालले बंगलादेशसँग भदौ २१ र २४ गते अन्तर्राष्ट्रिय मैत्रीपूर्ण खेल खेल्नेछ।

चारै जनाले ब्रदर्शमा सम्झौता गरेको र बंगलादेश जाने मिति भने अहिले तय भइनसकेको बताए । ‘अहिले राष्ट्रिय टोलीको प्रशिक्षकमा छौं, उनले भने,’उताबाट खबर आएपछि जान्छौं। जाने मिति तय‌ भइसकेको छैन।’

यसअघि राष्ट्रिय टोलीका डिफेन्डर अनन्त तामाङले फर्टिस एफसीमा अनुबन्ध भएका थिए । राष्ट्रिय टोलीका कप्तान तथा गोलकिपर किरण चेम्जोङ र विंगर आयुष घलानलाई बंगलादेश पुलिस क्लब तथा डिफेन्डर अभिषेक लिम्बू रहमतगञ्ज एमएफएसमा अनुबन्ध भएका थिए।

किरण र आयुष ढाका पुगिसकेका छन्। अनन्तको कप्तानीमा ललितपुर सिटी एफसीले लगातार दुई पटक नेपाल सुपर लिग र चर्च ब्वाइज युनाइटेडले सहिद स्मारक ए डिभिजन लिग जितेको थियो। अनन्तले केही दिनपछि बंगलादेश जाने बताएका छन्।

एरिकले बुटवल लुम्बिनी एफसी तथा सनिश र योगेशले च्याम्पियन ललितपुर सिटीबाट नेपाल सुपर लिग खेलेका थिए।