रविन्द्र वाईबा, बागमती
मकवानपुरको बागमती गाउँपालिकाले फुटबल एकेडेमी सञ्चालनको तयारी थालेको छ। राष्ट्रियस्तरको गोल्डकप आयोजना गर्दै आइरहेको बागमतीले अब व्यवसायिक रुपमा खेलाडी उत्पादन गर्ने गरि एकेडेमी सञ्चालनको तयारी सुरु गरेको हो।

पालिकाले `बागमती एकेडेमी´ सञ्चालनका खेलाडी छनोट कार्य सुरु गर्ने भएको गाउँपालिकाका अध्यक्ष सर्केश घलानले बताए। प्रारम्भिक चरणमा १० देखि १४ वर्ष उमेरसमूहका खेलाडीहरु छनोट गरिने भएको छ।

गाउँपालिकाले एकेडेमी सञ्चालनको लागि एकेडेमी भवनसमेत तयार पारेको छ। महिला र पुरुष दुवैतर्फका एकेडेमी भवनमा अन्तिम चरणको कार्य बाँकी रहेको अध्यक्ष घलानले बताए ।

भवन १ सय ५० जना क्षमता रहेको छ। पालिकाले विगतदेखी नै खेलकुद क्षेत्रलाई विशेष प्राथमिकता राख्दै आइरहेको र अब व्यवसायिक रुपमा खेलाडी तयार पार्ने पालिकाको लक्ष्य रहेको अध्यक्ष घलानको दाबी छ।

बिहिवार गाउँपालिकाका प्रमुख प्रशासकीय अधिकृत ओम बहादुर दर्जीले जारी गरेको सूचनामा गाउँपालिकाले पुरुष तथा महिला दुवै उमेर समूहका खेलाडीहरूको छनोट कार्यक्रम मिति, समय र स्थान तोकी प्रत्येक वडा कार्यालय, विद्यालय र सरोकारवालामार्फत जानकारी गराएको जनाएको छ।

खेलाडी छनोट कार्यक्रम भदौ १ गतेदेखि भदौ ६ गतेसम्म गाउँपालिकाका विभिन्न खेलमैदानमा हुनेछन्। भदौ १ गते ४ नम्बरस्थित सहिद स्मृति खेल मैदानमा, २ गते वडा नम्बर ६ स्थित जनता मावि खेलमैदानमा, ३ गते वडा नम्बर ८ स्थित खेलमैदान, ४ गते वडा नम्बर ७ स्थित लामिटार खेलमैदानमा हुनेछ ।

त्यस्तै ५ गते वडा नम्बर ३ स्थित सहिद स्मृति खेलमैदान, ५ गते वडा नम्बर १ स्थित रामपुर खेलमैदान मा र ६ गते वडा नम्बर २ स्थित राईगाउँ खेलमैदानमा खेलाडी छनोट हुनेछ।

गाउँपालिकाले छनोटमा भाग लिन इच्छुक खेलाडीलाई फुटबल जुत्ता, ट्र्याक, हाफ प्यान्ट, टिसर्ट र अनिवार्य रुपमा ल्याउन पनि अनुरोध गरेको छ।