एजेन्सी – बार्सिलोनाले ला लिगाको नयाँ सिजनको सुरुवात सहज जितबाट गरेको छ।

बार्सिलोनाले शनिवार राति मालोर्काको मैदानमा भएको खेलमा घरेलु टोलीलाई ३-० ले पाखा लगायो। खेलमा मालोर्काका २ खेलाडी पहिलो हाफमै रातो कार्ड पाएपछि बार्सिलोनाको जित सहज बनाइदियो।

खेल सुरु भएको सातौँ मिनेटमै लामिन यामालको क्रसमा राफिन्हाले नजिकैबाट हेड बाट पहिलो गोल गरे । पछिल्लो सिजन उत्कृष्ट फर्ममा रहेका यी दुई युवा खेलाडीले यस सिजनमा पनि सानदार सुरुवात गरेका छन्।

खेलको २३ औँ मिनेटमा फेर्रान टोरेसले पेनाल्टी क्षेत्रको बाहिरबाट शक्तिशाली प्रहारमा गोल गर्दै २-० को अग्रता बनाए। तर त्यसबेला मालोर्काको एक खेलाडी बलले टाउकोमा लागेर मैदानमा ढलेका कारण केही खेलाडीले खेल्न छोडेका थिए । त्यो कारण मालोर्काले गोलको बिरोध गरे।

३३ औं मिनेटमा मालोर्काका मानु मोरल्यानेसले यामाललाई फाउल गरेपछि दोस्रो पहेंलो कार्ड पाउँदै मैदानबाट बाहिरिए। उनले पहिलो पहेंलो कार्ड फेर्रानको गोलमा आपत्ति जनाउँदा पाएका थिए।

३९ औँ मिनेटमा स्ट्राइकर भेडात मुरिकीले बलमा उफ्रिदा बार्सिलोनाका गोलकिपर जोआन गार्सियालाई लातले जाने।

सुरुमा पहेंलो कार्ड देखाइए पनि भिएआर समीक्षा गरी रेफ्रीले उनलाई रातो कार्ड देखाए। यसपछि मालोर्का ९ खेलाडीमा सीमित भयो। इन्ज्युरी समयमा यामालले गोल गर्दै ३–० को जित सुनिश्चित गरे।

बार्सिलोनाले स्टार स्ट्राइकर रोबर्ट लेवान्डोस्कीबिना खेलेको थियो । उनी चोटका कारण टिमबाहिर थिए। नयाँ अनुबन्ध मार्कस रासफोर्ड ६९ औँ मिनेटमा परिवर्तित खेलाडीका रुपमा मैदानमा उत्रिए।

गोलकिपर गार्सिया यो सिजन एस्पान्योलबाट बार्सिलोना भित्रिएका हुन् । उनले आफ्नो पहिलो खेलमा खासै चुनौती सामना गर्न परेन। नियमित गोलकिपर मार्क-आन्द्रे टेर्स्टेगन चोटका कारण उपचार गराइरहेकाले गार्सिया पहिलो रोजाइमा रहे।

अन्य खेलमा रायो भालेसानोले जिरानोलाई ३-१ ले, भिल्लारियलले ओभिडोलाई २-० ले, अलाभेसले लेभान्तेलाई २-१ ले हरायो। भ्यालेन्सिया र रियल सोसिडाडबीचको खेल १-१ को बराबरीमा टुंगिएको छ।