दिपक बोहरा,ताप्लेजुङ

गत महिना भएको तेश्रो अन्तर्राष्ट्रिय आमन्त्रण ताप्लेजुङ गोल्डकप फुटबल प्रतियोगितामा ३२ लाख रुपैयाँभन्दा बढीको टिकट बिक्री भएको छ।

भानुजन माविको मैदानमा साउन २४ देखि ३१ गते सम्म भएको गोल्डकपमा कुल ३२ लाख ४६ हजार ७ सय रुपैयाँको टिकट बिक्री भएको बताइएको छ।

लाखेजात्रा पर्वको अवसरमा लाखेजात्रा सञ्चालन समितिद्वारा आयोजना गरिएको यस संस्करणमा टिकट बिक्री ठेक्का प्रक्रियामार्फत गरिएको थियो। टिकट बिक्रीको ठेक्का मेरिङदेन गाउँपालिकाका विशाल लङ्वा लिम्बूले पाएका थिए।

समितिका कोषाध्यक्ष दावा शेर्पाले ४ क्वाटर फाइनलमा ९ लाख ६१ हजार ५ सय,२ सेमिफाइनलमा ७ लाख ८५ हजार २ सय र फाइनलमा मात्र १५ लाख रुपैयाँको टिकट बिक्री भएको हो।

क्वाटरफाइनलतर्फ पहिलो दिन ३ लाख २३ हजार ९ सय, दोस्रो दिन १ लाख ८५ हजार ५ सय, तेस्रो दिन २ लाख २८ हजार ५ सय र चौथो दिन २ लाख २३ हजार ६ सय रुपैयाँ बराबरको टिकट बिक्री भएको थियो। क्वाटरफाइनलमा प्रति टिकट १ सय रुपैयाँ तोकिएको थियो।

त्यस्तै सेमिफाइनलमा २ सय रुपैयाँ टिकट दर तोकिएको थियो । पहिलो सेमिफाइनलमा १ हजार ६२५ दर्शकले टिकट काटी ३ लाख २५ हजार रुपैयाँ संकलन भएको थियो।

वर्षाका कारण सो दिन अपेक्षाकृत कम टिकट बिक्री भएको बताइएको छ। दोस्रो सेमिफाइनलमा २ हजार ३ सय १ दर्शकबाट ४ लाख ६० हजार २ सय रुपैयाँ बराबरको टिकट बिक्री भएको समितिले जनाएको छ।

फाइनलमा आयोजकले छापेको ६ हजारै प्रति टिकट बिक्री भएको थियो। प्रत्येक टिकट २ सर ५० रुपैयाँमा बिक्री भई कुल १५ लाख रुपैयाँ संकलन भएको हो।

प्यारापिटको क्षमता अनुसार सीमित संख्यामा मात्र टिकट छापिएकोमा सो दिन दर्शकको चाप बढ्दा टिकट अभावसमेत भएको आयोजकले जनाएको छ।

टिकट काट्ने दर्शकमध्ये गोलाप्रथाबाट हरेक दिन एकजनालाई स्मार्ट मोबाइल उपहारसमेत दिइएको थियो। सिराहाको सलहेश युवा क्लबले उपाधि जित्दै ७ लाख २ हजार ८२ रुपैयाँ प्राप्त गर्यो ।