एजेन्सी – विश्व कप छनोटको सेप्टेम्बरमा हुने अन्तिम २ खेलका लागि नेयमार ब्राजिलियन फुटबल टोलीमा परेनन् ।

ब्राजिलका मुख्य प्रशिक्षक कार्लो एन्सेलोटीले सेप्टेम्बरमा हुने विश्व कप छनोटका अन्तिम दुई खेलका लागि घोषणा गरिएको २३ सदस्यीय टोलीमा नेयमार र भिनिसियस जुनियरलाई समावेश गरेका छैनन्।

ब्राजिलले सेप्टेम्बर ४ मा घरेलु मैदानमा चिली र सेप्टेम्बर ९ मा बोलिभियाविरुद्ध उसकै मैदानमा खेल्नेछ। ब्राजिल पहिले नै विश्वकपका लागि छनोट भइसकेको छ।

३३ वर्षीय नेयमारलाई खुट्टाको मांसपेशी चोटका कारण टोलीमा नपारिएको हो। यसअघि पनि उनी चोटकै कारण एन्सेलोटीको पहिलो टोलीमा परेका थिएनन्।

घुँडाको लिगामेन्टमा गम्भीर चोटका कारण उनले अक्टोबर २०२३ पछि राष्ट्रिय टोलीका लागि खेल्न सकेका छैनन् । प्रशिक्षक एन्सेलोटीले नेयमार भविष्यमा फर्किन सक्ने सम्भावना राखे पनि फिटनेस सुधार्नुपर्ने बताएका छन्।

रियल म्याड्रिडका भिनिसियसलाई भने आराम दिइएको हो। क्लब विश्वकप र ला लिगाको व्यस्त खेल तालिकाका कारण उनलाई आराम दिइएको विश्वास गरिएको छ।

यस्तै, रियलकै एदर मिलिताओ पनि विश्राम दिइएको छ । रोड्रिगो र एन्ड्रिकलाई भने प्रदर्शनको आधारमा टोलीमा राखिएको छैन।

२३ सदस्यीय ब्राजिल टोली

अलिसन, बेन्टो, हुगो सौजा, अलेक्जान्द्रो रिबेरो, एलेक्स सान्ड्रो, काइओ हेन्रिक, डग्लास सान्टोस, फाब्रिसियो ब्रुनो, गाब्रिएल म्यागाल्हाएस, मार्किन्होस, भ्यान्डरसन, वेज्ले, एन्ड्रे सान्टोस, ब्रुनो गुइमारेस, कासेमिरो, जोएलिन्टन, लुकास पाकेता, एस्टेभाओ, गाब्रिएल मार्टिनेली, जोआओ पेद्रो, काइओ जोर्ज, लुइज हेन्रिक, माथेउस कुञ्हा, राफिन्हा, रिचार्लिसन।