काठमाडौं (हाम्रो खेलकुद)- नेपालले भुटानमा जारी साफ यु १७ महिला च्याम्पियनसिपमा आज अर्को प्रतिस्पर्धा गर्दैछ।

थिम्पुस्थित चाङलिमिथाङमा दिउँसो २:४५ बजे सुरु हुने खेलमा नेपालले बंगलादेशको सामना गर्नेछ। यसअघिका ३ मध्ये २ खेलमा‌ हार बेहोरेको नेपालले १ खेलमा‌ जितेको थियो।

भुटानको राजधानी थिम्पुस्थित चाङ्लिमिथाङ रंगशालामा आज जितको दबाबमा नेपली टोली हुनेछ। उपाधि जित्ने सपनलाई कायमै राख्न बलियो प्रतिद्वन्द्वी बंगलादेशलाई माथ दिन नेपालले सुधारिएको प्रदर्शन गर्न जरुरी छ।

डिफेन्सलाई चुस्त बनाउने र गोल गर्ने अवसर सिर्जना गर्ने चुनौती युवा खेलाडीलाई रहेको छ। बंगलादेशसँग हारेको पहिलो खेलमा डिफेन्समा नेपाल कमजोर देखिएको थियो।

नेपालसँगको पहिलो लेगमा बंगलादेशले निरन्तर दबाब बनाएको थियो। बंगलादेशको‌ त्यो रणनीति तोड्न नेपाली प्रशिक्षकलाई‌ पनि चुनौती रहनेछ। किनकी बराबरी या हारको अर्थ नेपालको उपाधि यात्रामा पूर्णबिराम लाग्नु हो।

नेपाल पहिलो खेलमा भारतसँग ७-० को फराकिलो अन्तरमा हार्दा दोस्रो खेलमा कमब्याक गर्दै घरेलु टोली भुटानलाई २-१ ले हराउन सफल भएको थियो।

तेस्रो खेलमा बंगलादेशसँग ३-० को हार बेहोरेको थियो। ३ खेलमा नेपालले मात्र ३ अंक बनाएको छ। नेपालले ११ गोल खाँदा मात्र २ गोल गरेको छ। यसले नेपाली फर्वाडलाई पनि गोल गर्ने दबाब रहनेछ।

दुई पटकको विजेता बंगलादेशले भुटानलाई ३-१ ले पराजित गरेको थियो भने भारतसँग भने २-० को हार बेहोरेको थियो। ३ खेलमा बंगलादेशले ६ अंक छ। प्रमुख दाबेदार भारतले भने लगातार ३ जितेर ९ अंक बनाएको छ।

प्रतियोगितामा दक्षिण एसियाका ४ राष्ट्र नेपाल, भुटान, बंगलादेश र भारतले सहभागीता जनाएका छन्।‌ डबल राउन्ड रोबिन लिगपछि अंक तालिकाको शीर्ष टोली च्याम्पियन बन्नेछ।