एजेन्सी – म्यानचेस्टर युनाइटेड लिग कपबाट बाहिरिएको छ। प्रिमियर लिगका सुरुवाती २ खेलमा जित निकाल्न नसकेको युनाइटेड बुधवार चौथो श्रेणीको ग्रिम्सबीसँग पेनाल्टी सुटआउटमा १२-११ ले पराजित हुँदै प्रतियोगिताबाट बाहिरिएको हो ।

२-२ को बराबरी पछि पेनाल्टीमा युनाइटेड पराजित भयो । २-० ले पछि परेको खेलको अन्तिम समयमा युनाइटेडले बराबरी गरेको थियो।

चार्ल्स भर्नाम २२ औं र टाइरेल वारेनले ३०औं गोल गर्दै ग्रिम्सबीलाई पहिलो हाफमा २-० ले अघि बढाए। युनाइटेडका गोलकिपर आन्द्रे ओनानाको गल्तीमा दोस्रो गोल सहजै भएको हो।

दोस्रो हाफमा प्रशिक्षक रुबेन अमोरिमले ब्रुनो फर्नान्डेस, ब्रायन एमबेमो र म्याथाइस डि लिग्टलाई मैदानमा उतारेपछि युनाइटेड खेलमा फर्कियो। एमबेमोले ७५औं फर्काए र अन्तिम मिनेटमा ८९औं ह्यारी म्याग्वायरले बराबरी गोल गरे।

तर पेनाल्टीमा युनाइटेड चुक्यो। म्याथियस कुन्हाले पाँचौं पेनाल्टीमा गोल गर्न सकेनन् । एमबेमोको अर्को प्रहार बारमा लाग्यो। अन्ततः ग्रिम्सबीले १२–११ को जित निकाल्दै प्रतियोगिताको इतिहासकै ठूलो जित निकाल्यो।

प्रिमियर लिग क्लबहरूले प्रायः सहज जित निकाले भने केही खेलमा तल्लो डिभिजनका क्लबहरूले आश्चर्यजनक नतिजा ल्याए।

एभर्टनले म्यान्सफिल्ड टाउनलाई २-० ले हराउँदै तेस्रो चरणमा स्थान सुरक्षित गर्‍यो। फुलहमले ब्रिस्टल सिटीमाथि २-० को जित निकाल्यो। ब्राइटनले भने ठूलो अन्तरको जित निकाल्ने क्रममा अक्सफोर्ड युनाइटेडलाई ६-० ले पराजित गर्‍यो।

वुल्भ्सले वेस्ट ह्यामलाई ३-२ ले र मिलवालले कोभेन्ट्री सिटीलाई २-१ ले हरायो। स्वान्सीले प्लायमाउथसँग १-१ को बराबरीपछि पेनाल्टीमा ५-३ को जित निकाल्यो।

त्यस्तै वेरक्सह्यामले प्रेस्टन नर्थ एन्डलाई ३–२ ले हराउँदै ठूलो नतिजा निकाल्यो। सेफिल्ड वेडनेसडे र लिड्स युनाइटेडको खेल १-१ को बराबरीमा सकिए पनि पेनाल्टीमा सेफिल्ड वेडनेसडे ३-० ले विजयी भयो।

पोर्ट भेलले बर्मिङ्हम सिटीलाई १-० ले पराजित गर्‍यो।
ब्रेन्टफोर्डले बोर्नमाउथलाई २-० ले हरायो। बर्न्लीले डर्बी काउन्टीमाथि २-१ को जित निकाल्यो। ब्राडफोर्ड सिटीले स्टोक सिटीलाई र कार्डिफ सिटीले चेल्टेनह्यामलाई समान ३-० ले पराजित गर्‍यो।

तेस्रो चरणमा अब आर्सनल, लिभरपुल, म्यानचेस्टर सिटी, चेल्सी, टोटेनहम जस्ता ठूला क्लब पनि प्रतियोगितामा प्रवेश गर्नेछन्।