एजेन्सी – सिएटल साउन्डर्सले इन्टर मियामीलाई ३-० ले हराउँदै २०२५ लिग्स कपको उपाधि जितेको छ।

सिएटलको लुमेन फिल्डमा भएको फाइनलमा लियोनेल मेस्सीको ४७औं करिअर उपाधि जित्ने प्रयास असफल रहे।

सिएटलका ओसाजे डे रोजारियोले २६औं मिनेटमा पहिलो गोल गरे। ८४औं मिनेटमा एलेक्स रोदानले पेनाल्टीमार्फत गोल थपे भने ८९औं मिनेटमा पॉल रोथरकले तेस्रो गोल गर्दै जित पक्का गरे।

सिएटलले प्रतियोगिताभर खेलेका ६ खेलमा १५ गोल गर्दै मात्र २ गोलको सामना गर्यो। यसै क्रममा टोलीले एमएलएस र लिगा एमएक्स क्लबबीचको यो क्षेत्रीय प्रतियोगिता जित्यो। इन्टर मियामी १६औं खेलमा पहिलो पटक गोलविहीन रह्यो।

सन् २०२३ मा पहिलो लिग्स कप जितेको इन्टर मियामीले खेल बराबरी गर्ने अवसर गुमायो। ५०औं मिनेटमा लुइस सुवारेजको पासपछि मेस्सीको प्रहार गोलपोस्टमाथि बाहिरियो। ६०औं मिनेटमा ताडेओ आलेन्देले गोलपोस्ट बाहिर प्रहार गरे।

यो सिजन इन्टर मियामीले उपाधि जित्ने तेस्रो मौका पनि गुमायो। यसअघि उनीहरू कन्काकाफ च्याम्पियन्स कप र फिफा क्लब विश्वकपमा पनि असफल भएका थिए।
फाइनलपछि मैदानमा खेलाडीबीच विवाद भयो।

सुवारेजले सिएटलका ओबेड वर्गासलाई ‘हेडलक’मा समातेको एप्पल टिभीका विश्लेषक टेलर ट्वेलम्यानले बताए। तर केही समयमै अवस्था सामान्य बनेर दुवै टोलीले ट्रफी वितरणमा सहभागिता जनाए।