काठमाडौं (हाम्रो खेलकुद)- संकटा क्लब एन्फा राष्ट्रिय महिला लिगको लागि छनोट हुने पहिलो टोली बनेको छ।

पूर्णिमा राईको ह्याट्रिकमा संकटाले आज एनबिएम पोखरा गर्ल्स एफसीलाई ६-१ ले हराउँदै एक खेल अगाडि नै छनोट भएको हो।

च्यासल खेल मैदानमा आज भएको खेल एकपक्षीय बन्यो। खेलको पाँचौं मिनेटमा नै सेनु परियारको गोलमा संकटाले सुरुवाती अग्रता बनायो। १८ औं मिनेटमा पोखरा गल्सको लागि विपना गुरुङले एक गोल फर्काइन्। खेल १-१ को बराबरीमा पुग्यो।

तर यसपछि संकटा थप ५ गोल गर्यो। ३१ औं र ४२ औं मिनेटमा पूर्णिमाले दुई गोल गरिन्। पहिलो हाफमा संकटाले ३-१ को अग्रता बनायो।

त्यसपछि ५५ औं मिनेटमा पूर्णिमाले ह्याट्रिकको सफलता प्राप्त गरिन्। ६० औं मिनेटमा सेनुले व्यक्तिगत दोस्रो गोल गर्दै टोलीलाई ५-१ को अग्रता दिलाइन्।

पोखरा गर्ल्सलाई रोशनी तामाङले खेलको ६७ औं मिनेटमा गरेको आत्मघाती गोलमा संकटाले ६-१ को जित दर्ज गर्यो। यो जितमा ५ खेलबाट १५ अंक बनाएको संकटा एक खेल अगाडि नै छनोट भयो ।

छनोटपछि टोलीका प्रशिक्षक रविन्द्र शिलाकारले मोफसलको प्रतियोगिताहरूको कारण टिमलाई यो छनोट खेल्न सहज भएको बताए।

उनले यु-२० टिमका खेलाडी, कोशी प्रदेश र एकेडेमीका खेलाडील टोली बलियो बनेको र अब राष्ट्रिय महिला लिगमा विभागीय टिमहरूलाई टक्कर दिने योजना सहित अगाडि बढ्ने पनि हाम्रो खेलकुद डटकमलाई जानकारी दिए।

कप्तान यशोदा शाहीले मोफसलमा आर्मीलाई हराएपछि टोली सशक्त हुँदै अगाडि बढेको भन्दै टिम म्यानेजमेन्ट राम्रो भएको कारण छनोट सहज भएको प्रतिक्रिया दिइन्।

संकटाले ग्रुप ‘बी’ को शीर्षस्थानमा छ। ४ खेल खेलेको एनआरटी र ५ खेल खेलेको झापा एफसीसँग समान ९ अंक छ। संकटाले आफ्नो अन्तिम खेल एनआरटीसँग खेल्नेछ। संकटा अघिल्लो सिजन रेलिगेसनमा परेको थियो।

यो छनोटमा कुल १४ टोलीको सहभागिता छ। दुवै समूहबाट शीर्ष दुई टोली लिगको लागि छनोट हुनेछन्।
दुई समूह को तेस्रो हुने टोलीबीच प्लेअफबाट एक गरी ५ टोली राष्ट्रिय लिगमा छनोट हुनेछन्। यहाँबाट छनोट हुने टोलीले राष्ट्रिय लिगमा ३ विभागीय टोली, कोशी प्रदेश र बागमती प्रदेशसँग खेल्नेछन्।