एजेन्सी – विश्वकप छनोटको सुरुवाती खेलमै जर्मनी स्लोभाकियासँग २-० ले पराजित भएको छ।

ब्रातिस्लाभामा भएको खेलमा डेविड ह्यान्कोले पहिलो हाफको अन्त्यतिर गोल गर्दै स्लोभाकियालाई अग्रता दिलाए। ५५औं मिनेटमा डेविड स्ट्रेलेकले शानदार प्रहार गर्दै गोल गरे र जित पक्का गरे।

यो नतिजासँगै स्लोभाकियाले समूह ए मा उत्कृष्ट सुरुवात गरेको छ। सन् २०१० पछि पहिलोपटक विश्वकपमा पुग्ने प्रयासमा रहेको स्लोभाकियाका लागि यो ठूलो परिणाम बनेको छ।

जर्मनी पछिल्ला दुई विश्वकपमा समूह चरणमै बाहिरिएको छ । तर पनि विश्व कपमा लगातार छनोट हुँदै आएको छ।अब जर्मनीले मंगलबार उत्तरी आयरल्याण्डविरुद्ध घरेलु मैदानमा खेल्नेछ। यसै समूहमा लक्जेम्बर्ग पनि प्रतिस्पर्धामा छ। प्रत्यक्ष छनोट भने समूह विजेताले मात्र पाउनेछ।

उत्तरी आयरल्याण्डले लक्जेम्बर्गलाई ३-१ ले हरायो। जेमी रिड, शिया चार्ल्स र जस्टिन डेभेनीले गोल गरे। घरेलु टोलीका लागि ऐमान दार्दारीले बराबरी गोल गरे पनि दोस्रो हाफमा सेइद कोराक रातो कार्ड खाँदा टोलीको‌ आशा समाप्त भएको थियो।

समूह ई मा युरोपियन च्याम्पियन स्पेनले बल्गेरियालाई ३-० ले हरायो। खेलको पाँचौँ मिनेटमै मिकेल ओयार्जाबालले गोल गर्दै अग्रता दिलाए। त्यसपछि मार्क कुकुरेलाले ३०औं मिनेटमा दोस्रो गोल गरे। लामिन यामालले ३८औं मिनेटमा मिकेल मेरिनोलाई पास दिए र उनले तेस्रो गोल थपे।