एजेन्सी – मोरोक्कोले नाइजरलाई ५-० ले हराउँदै २०२६ फिफा विश्वकपमा स्थान सुरक्षित गरेको छ। यो सँगै २०२६ विश्व कपका लागि छनोट हुने मोरोक्को पहिलो अफ्रिकी टोली बनेको छ।

कतार २०२२ मा इतिहास रच्दै सेमिफाइनल पुगेको मोरोक्को लाई शुक्रबार तान्जानियाले काँगो–ब्राजाभिलसँग १-१ को बराबरी खेलेपछि जित निकाले पुग्ने अवस्था थियो।

रबातमा भएको खेलमा नाइजरका अब्दुल–लतिफ गुमेइ २६ औं मिनेटमा दोस्रो पहेँलो कार्ड पाएपछि मैदान बाहिरिएका थिए। त्यसको तीन मिनेटमै युसेफ बेलामारीको क्रसलाई इस्माएल सैबारीले गोलमा परिणत गर्दै अग्रता दिलाए।

मध्यान्तर अघि नै सैबारीले अशराफ हाकिमीद्वारा दिएको पासमा दोस्रो गोल थपे। दोस्रो हाफको सुरुवातमा बेलामारीकै अर्को उत्कृष्ट क्रसलाई अयुब एल काबीले जाली चुमाउँदै तेस्रो गोल गरे।

पूर्व रेंजर्स खेलाडी हम्जा इगामानेले मैदानमा प्रवेश गरेपछि कर्नरमार्फत आफ्नो पहिलो अन्तर्राष्ट्रिय गोल गरे । अन्तिमतिर अज्जेदिन उनाहीले गोल गर्दै अग्रता ५-० बनाए।

मोरोक्कोले पुनर्निर्माण गरिएको प्रिन्स मौलाई अब्दल्ला रंगशालामा पहिलो खेल खेलेका थिए। यही रंगशालामा २०२५ अफ्रिका कप अफ नेसन्सको फाइनल र २०३० को सह–आयोजित विश्वकपका खेलहरू हुनेछ।

अफ्रिकी छनोट अन्तर्गत अब अन्य ८ समूह विजेता सिधै विश्वकपमा जानेछन् । उत्कृष्ट चार उपविजेताले प्ले–अफमार्फत प्रतिस्पर्धा गर्नेछन्।