एजेन्सी – इटालीले विश्वकप छनोटमा सोमवार इजरायललाई ५-४ ले हराएको छ।

खेलमा दुई पटक पछि परेको । दुईवटा आत्मघाती गोल खाएको । अन्तिम समयमा बराबरी गोलको सामना गरेपनि इन्ज्युरी समयमा गोल गर्दै इटाली विजयी भयो।

नयाँ प्रशिक्षक जेनारो गट्टुसोको नेतृत्वमा इटालीले यसअघि एस्टोनियामाथि ५-० को सहज जित निकालेको थियो। तर यसपटक इजरायलविरुद्धको खेल निकै संघर्षपूर्ण गर्नुपर्यो ।

खेलको १६औं मिनेटमा लोकेतेलीको आत्मघाती गोलमार्फत इजरायलले अग्रता लियो। तर पहिलो हाफ सकिन ५ मिनेट बाँकी रहँदा म्वाइज केनले प्रहार गर्दै बराबरी गोल गरे।

दोस्रो हाफ सुरु भएलगत्तै डोर पेरिट्जले गोल गर्दै इजरायललाई पुनः अघि बढाए। तर २ मिनेटमै केनले फेरि गोल गर्दै खेललाई बराबरी बनाए।

५८औं मिनेटमा पोलितानोको गोलले इटालीलाई पहिलो पटक अग्रता लियो। त्यसपछि ८१औं मिनेटमा परिवर्तन खेलाडी रसपाडोरीले गोल गरेपछि इटाली जिततर्फ अग्रसर बन्यो ।

तर ८७औं मिनेटमा बास्टोनीको आत्मघाती गोलले इजरायललाई फर्कायो । ८९औं मिनेटमा पेरिट्जले दोस्रो गोल गर्दै खेल ४-४ बराबरीमा पुर्‍याए।

तर इन्ज्युरी समयको पहिलो मिनेटमा इटालीका सान्द्रो तोनालीले टाढाबाट प्रहार गर्दै निर्णायक गोल गरे ।
यो जितपछि इटली ९ अंकसहित समूह ‘आई’ को दोस्रो स्थानमा पुगेको छ।

गोल अन्तरका आधारमा इटाली इजरायलभन्दा अघि छ ‌। एक खेल कम खेलेको अवस्थामा अग्रस्थानमा रहेको नर्वेभन्दा ३ अंकले पछि छ।