स्पेन (एजेन्सी) – स्पेनिस ला लिगा अन्तर्गत बुधबार राती भएको खेलमा रियल म्याड्रिडले घरेलु टोली डेपोर्टिभो ला कोरुनालाई ६-२ले पराजित गरेको छ।
रोनाल्डो, बेल, बेन्जेमा, मोड्रीच लगायतका स्टार खेलाडीलाई विश्राम दिइएको खेलमा म्याड्रिडका युवा खेलाडीहरुले उत्कृष्ट प्रदर्शन गरे। खेलको पहिलो मिनेटमै अल्भारो मोराटाले इस्कोको पासलाई सदुपयोग गर्दै रियललाई खेलमा अगाडी बढाएका थिए। हामेस रोड्रीग्वेजले १४औं मिनेटमा गोल गर्दै म्याड्रिडको अग्रता बढाएका थिए। तर फ्लोरिन आन्डोनेले ३५औं मिनेटमा गोल गरेपछि घरेलु टोलीको खेलमा फर्कने आशा जागेको थियो। लुकास भाज्केजले ४४औं मिनेटमा गोल गर्दै हाफ टाइममा म्याड्रिडलाई २ गोलले अगाडी बढाए।
दोश्रो हाफमा रोड्रीग्वेज, इस्को र क्यसेमिरोले गोल गर्दै म्याड्रिडको जित सुनिश्चित गरेका थिए। ८४औं मिनेटमा घरेलु टोलीका लागि होसेलुले दोश्रो गोल गरेका थिए।
यस जितसंगै रियलको ३३ खेलमा ७८ अंक भएको छ। यद्दपी समान अंक बोकेर शीर्षस्थानमा रहेको बार्सिलोनाले १ खेल बढी खेलेको छ।
