म्याड्रिड (एजेन्सी) – स्पेनिस ला लिग अन्तर्गत शनिबार राती भएको खेलमा रियल म्याड्रिडले घरेलु मैदान सान्टियागो बर्नाबाउमा भ्यालेन्सियालाई २-१ले पराजित गरेको छ।
खेलको २७औं मिनेटमा क्रिस्टियानो रोनाल्डोले गोल गरेपछि म्याड्रिडले खेलमा अग्रता लिएको थियो उनले ड्यानी कार्भाजलको क्रसलाई हेडरमार्फत गोल गर्दै म्याड्रिडलाई अग्रता दिलाएका थिए। खेलको ५७औं मिनेटमा लुका मोड्रीचलाई बक्स भित्र लडाएपछि म्याड्रिडले पेनाल्टीको अवसर पाएको थियो। तर रोनाल्डोको पेनाल्टी प्रहार भ्यालेन्सियाका गोलरक्षक डिएगो आल्भेसले बचाएका थिए।
खेलको ८२औं मिनेटमा ड्यानी परेहोले फ्रिकिक बाट उत्कृष्ट गोल गर्दै खेललाई बराबरीमा ल्याएका थिए। तर उक्त गोलको ३ मिनेट पछिनै मार्सेलोले उत्कृष्ट गोल गर्दै म्याड्रिडलाई पुन: खेलमा अगाडी बढाएका थिए।
जितसंगै रियलको ३४ खेलमा ८१ अंक भएको छ। समान खेल खेलेको बार्सिलोना भन्दा रियल ३ अंकले अगाडी छ।
