एजेन्सी – इङ्गलिस प्रिमियर लिग अन्तर्गत आइतबार राती हुने खेलमा नर्थ लण्डनका दुइ टोली आर्सनल र टोटेनहम हट्स्पर आमनेसामने हुँदैछन्।
लिगमा उत्कृष्ट प्रदर्शन गरिरहेको टोटेनहम घरेलु मैदानमा जितसंगै इतिहास रच्ने सुरमा हुनेछ। उसले सन् १९९५ यता लिगमा आर्सनल भन्दा माथि रहेर सिजनको अन्त्य गरेको छैन। तर आज हुने खेलमा तिन अंक हासिल गर्न सके यस सिजनमा आर्सनल टोटेनहम भन्दा तल रहने पक्का हुनेछ।
टोटेनहमका लागि मिडफिल्डर मुसा डेम्बेले र डिफेन्डर ड्यानी रोजको खेल्ने सम्भावना एकदम कम छ भने मिडफिल्डर द्वय एरिक लामेला र ह्यारी विंक्स चोटका कारण विश्राममा छन्।
आर्सनलका लागि डिफेन्डर लौरेन्ट कोसिएल्नी चोटका कारण आजको खेलमा उपलब्ध हुने छैनन्। उनीसंगै अर्का डिफेन्डर स्कोडरान मुस्ताफी, गोलरक्षक डेबिड ओस्पिना, फरवार्ड लुकास पेरेज र मिडफिल्डर सान्टि कजोर्ला चोटका कारण मैदान बाहिर रहनेछन्।
यी दुइ टोलिबिचका पछिल्ला ५ लिग खेलमा ४ खेल बराबर भएको छ भने १ खेल टोटेनहमले जितेको छ।
