टोटेनह्याम (एजेन्सी)– प्रिमियर लिगको उपाधितर्फ अघि बढेको चेल्सीलाई टोटेनह्यामले पछ्याइरहेको छ । चेल्सीले एभर्टनलाई ३–० ले हराएको केही समयपछि आर्सनललाई २–० ले हराएपछि टोटेनह्यामले उपाधि दौडलाई कायम राखेको छ ।
जितपछि टोटेनह्यामले पुनः चेल्सीसँगको दुरीलाई ४ अंकमा घटाएको छ । अन्तिम ४ खेल बाँकी रहँदा शीर्ष टोली चेल्सीको ८१ र टोटेनह्यामको ७७ अंक छ । हारपछि आर्सनलको शीर्ष चारमा प्रिमियर लिग टुंगाउने सम्भावना कमजोर बनेको छ ।
चौथो स्थानको म्यानचेस्टर सिटी र पाँचौं स्थानको म्यानचेस्टर युनाइटेडले अलग अलग खेलमा बराबरीमा चित्त बुझाउँदा आर्सनलले त्यसको फाइदा उठाउन सकेन ।
टोटेनह्याम र आर्सनलबीचको पहिलो हाफ बराबरीमा टुंगिएको थियो । डेले अलिले ५५ औं मिनेटमा पहिलो गोल गरेका थिए । त्यसको तीन मिनेटपछि हेरी केनले पेनाल्टीमा गोल गर्दै टोलीको अन्तरलाई दोब्बर पारेका थिए ।
