म्याड्रिड (एजेन्सी) – स्टार फरवार्ड क्रिस्टियानो रोनाल्डोले च्याम्पियन्स लिगमा लगातार ह्याट्रिक गरेपछि रियल म्याड्रिडले एट्लेटिको म्याड्रिडलाई ३-०ले पराजित गरेको छ।
युरोपेली च्याम्पियन्स लिग अन्तर्गत मंगलबार राती रियलको घरेलु मैदान सान्टियागो बर्नाबाउमा भएको खेलमा एट्लेटिको सुरुवातदेखि दवावमा रहेको थियो।खेलको १०औं मिनेटमा क्रिस्टियानो रोनाल्डोले हेडर मार्फत गोल गर्दै घरेलु टोलीलाई अग्रता दिलाएका थिए।
पहिलो हाफ १-०ले पछि परेको एट्लेटिकोले मौका पाएपनि गमेरियोले पाएको मौकाको सदुपयोग गर्न सकेनन्। वान भर्सेस वानको स्थितिमा नाभासले राम्रो बचाउ गरेर अग्रता कायम राखेका थिए। खेलको ७३औं मिनेटमा दोश्रो गोल गर्दै रोनाल्डोले टोलीलाई २-०ले अगाडी बढाए। उनले बेन्जेमाको पासमा गोल गरेका थिए।
निर्धारित समयको ४ मिनेट बाँकी रहँदा लुकास भाज्केजको कटब्याकलाई सदुपयोग गर्दै रोनाल्डोले ह्याट्रिक पुरा गरेका थिए। उनले पछिल्ला ३ च्याम्पि़न्स लिग खेलमा ८ गोल गरेका छन्।
