बार्सिलोना (एजेन्सी) – स्पेनिस ला लिगा अन्तर्गत शनिबार राती भएको खेलमा बार्सिलोनाले भिल्लारीयाललाई ४-१ले पराजित गर्दै शीर्षस्थानमा आफ्नो पकड कायमै राखेको छ। बार्सिलोनाको जितमा लियोनेल मेस्सीले २ गोल गरेका थिए भने लुइस सुआरेज र नेयमारले पनि १/१ गोल थपेका थिए।
खेलको २१औं मिनेटमा नेयमारले गोल गर्दै बार्सिलोनालाई अग्रता दिलाएपनि त्यसको ९ मिनेट नबित्दै भिल्लारीयाल खेलमा फर्किएको थियो। रोबर्टो सोल्डाडोको पासमा सेड्रिक बकम्बुले गोल गर्दै खेललाई बराबरीमा ल्याएका थिए। तर, लिओनेल मेस्सीले ४५औं मिनेटमा गोल गर्दै हाफ टाइममा बार्सिलोनालाई २-१ अन्तरले अघि बढाए।
खेलको ६९औं मिनेटमा सर्जी रोबर्टोको पासलाई सदुपयोग गर्दै लुइस सुआरेजले बार्सिलोनाको अग्रता दोब्बर पारेका थिए। खेलको ८२औं मिनेटमा जामे कोष्टाले बक्सभित्र ह्यान्ड गरेपछि बार्सिलोनाले पेनाल्टीको अवसर पाएको थियो। लिओनेल मेस्सीले पेनाल्टीमार्फत गोल गर्दै बार्सिलोनाको जित सुनिश्चित गरेका थिए।
जितसंगै बार्सिलोनाको ८४ अंक भएको छ। शीर्षस्थानमा रहेको बार्सिलोनाले अब लिग अन्तर्गत २ खेल मात्र खेल्न बाँकी छ।
