टुरीन (एजेन्सी) – च्याम्पियन्स लिग अन्तर्गत सेमीफाइनल चरणको दोश्रो लेगमा २-१को जितसंगै समग्रमा ४-१को अग्रता लिंदै इटालीयन क्लब युभेन्टस प्रतियोगिताको फाइनलमा पुगेको छ।
युभेन्टस घरेलु मैदानमा भएको खेलमा मारीयो मान्जुकिचले ३३औं मिनेटमा गोल गर्दै टोलीलाई अग्रता दिलाएका थिए। पहिलो हाफको नियमित समय सकिनै लाग्दा ड्यानी आल्भेसले गोल गरेर युभेन्टसको अग्रता दोब्बर पारेका थिए।
च्याम्पियन्स लिगको पछिल्ला ६ खेलमा गोल नखाएको युभेन्टसले खेलको ६९औं मिनेटमा गोल खायो। किलिएन बाप्पेले जोआओ मोउटिन्होको पासलाई सदुपयोग गर्दै मोनाकोका लागि सान्तवना गोल गरेका थिए।
जितसंगै युभेन्टस च्याम्पियन्स लिगको फाइनलमा पुगेको छ र उसले रियल म्याड्रिड र एट्लेटिको म्याड्रिड बिचको खेलको विजेता संग उपाधिको लागि भिड्नेछ।
