एजेन्सी – इङ्गलिस प्रिमियर लिग अन्तर्गत बुधबार राती भएको खेलमा आर्सनलले साउथह्याम्पटनलाई २-०ले पराजित गरेसंगै अंक तालिकाको शीर्ष ४को लडाईं पनि रोमांचक हुँदै गएको छ।
साउथह्याम्पटनको घरेलु मैदानमा भएको खेलको ६०औं मिनेटमा एलेक्सिस स्यानचेजले गोल गर्दै पाहुना टोलीलाई अग्रता दिलाएका थिए। नियमित समयको ७ मिनेट खेल बाँकी रहँदा ओलिभिएर जिरुडले गोल गरेपछि आर्सनलको जित पक्का भएको थियो।
यस जितसंगै आर्सनलले म्यानचेस्टर युनाईटेडलाई उछिन्दै अंक तालिकाको पाँचौ स्थानमा उक्लिएको छ। समान ३५ खेल खेलेको युनाईटेडको ६५ अंक छ भने आर्सनलको ६६ अंक रहेको छ। म्यानचेस्टर सिटीले ३५ खेलमा ६९ अंक जोडेको छ भने तेश्रो स्थानमा रहेको लिभरपुलले ३६ खेल खेल्दै ७० अंक बनाएको छ।
शीर्ष ४ स्थानमा पर्ने टोलीले अर्को वर्ष च्याम्पियन्स लिगमा सहभागिता जनाउन पाउनेछन् भने पाँचौ र छैठौं स्थानमा रहने टोलीले युरोप लिगमा चित्त बुझाउनु पर्नेछ।
