एजेन्सी – इङ्गलिस प्रिमियर लिग अन्तर्गत आज राती हुने वेष्ट ब्रमविच आल्बियनविरुद्ध खेलमा जीत हात पार्न सके चेल्सीले यस सिजनको प्रिमियर लिग उपाधि जित्ने पक्का हुनेछ।
वेष्ट ब्रमको घरेलु मैदान ‘द हथ्रन्स’मा खेलिने खेलमा चेल्सीका लागि मिडफिल्डर एन’गोलो कान्टे खेल्नेमा भने शंका छ। उनले चेल्सीले खेलेको पछिल्लो खेल चोटका कारण गुमाएका थिए। यसैगरी प्रशिक्षक एन्टोनियो कोन्टेले विलियनलाई सुरुवाती एघारमा सामेल गरेर पेड्रोलाई विश्राम दिने सम्भावना पनि रहेको छ।
चेल्सी ३५ खेलमा ८४ अंक बोकेर प्रिमियर लिगको शीर्षस्थानमा रहेको छ। दोश्रो स्थानमा रहेको टोटेनहमको समान ३५ खेलमा ७७ अंक रहेको छ। आजको खेलमा ३ अंक हात पार्न सके चेल्सीले स्पर्सको ३ खेल बाँकी रहँदा १० अंकको अग्रता बनाउनेछ। प्रिमियर लिगको यसै साता हुने खेलमा टोटेनहमले म्यानचेस्टर युनाईटेडको समान गर्दैछ।
चेल्सी र वेष्ट ब्रमबिचको खेल मध्यरातको १२:४५ बजे सुरु हुनेछ।
