एजेन्सी – युरोपेली च्याम्पियन्स लिगको फाइनलमा विश्व फुटबलका दुई महारथी भिड्ने पक्का भएसंगै फुटबल समर्थकहरुमाझ कौतुहलता बढ्दो छ।
फाइनलमा पुगेका २ टोलीले आफुलाई उपाधि भिडन्तसम्म ल्याउँदा उत्कृष्ट प्रदर्शन गरेका थिए। प्रतियोगिताकै उत्कृष्ट आक्रमण र डिफेन्सको खेल पक्कैपनि हेर्नलायक हुनेछ। प्रतियोगितामा सर्वाधिक ३२ गोल गरेको रियलको टोलीमा बिबिसीले परिचित क्रिस्टियानो रोनाल्डो, क्रिम बेन्जेमा र ग्यारेथ बेलको जोडी रहेको छ भने प्रतियोगिता भर जम्मा ३ गोल खाएको युभेन्टसको डिफेन्समा आन्द्रीए बार्जाग्ली, लिओनार्डो बोनुची र जिओर्जिओ किएलिनी रहेका छन्। भेट्रान गोलरक्षक जियानलुइजी बुफोनले पनि आफु उमेर बढ्दै जाँदा खेलमा पनि उतिक्कै अब्बल प्रदर्शन दिइरहेका छन्।
प्रतियोगिताको फाइनल खेलका लागि रियल म्याड्रिडका ग्यारेथ बेल स्वस्थ हुने नहुनेमा भने अझैपनि शंका रहेको छ। उनको अनुपस्थितिमा स्पेनिस खेलाडी इस्कोले आक्रमणमा सहयोग गर्नेछन्।
यससंगै फाइनल खेलमा दुवै टोलीका पुर्वखेलाडी आफ्नो पुरानो क्लबका विरुद्ध उत्रनेछन्। युभेन्टसका स्टार स्ट्राइकर गोन्जालो हिगुआइन कुनै समय रियल म्याड्रिडमा व्यावसायिक फुटबल खेल्थे भने म्याड्रिडका युवा स्ट्राइकर अल्भारो मोराटा अघिल्लो सिजन युभेन्टसमा थिए। मोराटा म्याड्रिड फर्किएपछि हिगुआइन युभेन्टस पुगेका थिए।
