एजेन्सी – इङ्गलिस प्रिमियर लिग अन्तर्गत शनिबार भएको खेलमा म्यानचेस्टर सिटीले लेस्टर सिटीलाई २-१ले पराजित गर्दै अंक तालिकाको तेश्रो स्थानमा उक्लिएको छ।
खेलको २९औं मिनेटमा लेरोए सानेको पासलाई सदुपयोग गर्दै डेविड सिल्भाले म्यानचेस्टर सिटिलाई अग्रता दिलाएका थिए। त्यसको ७ मिनेट नबित्दै सानेलाई बक्सभित्र लडाएपछि सिटीले पेनाल्टीको मौका पाएको थियो। ग्यब्रिएल जेससले उक्त पेनाल्टीलाई गोलमा परिणत गर्दै सिटीलाई २ गोलको अग्रता दिलाए। पहिलो हाफ सकिनुअघि लेस्टरले पनि खेलमा फर्कने आशा देखायो। खेलको ४२औं मिनेटमा मार्क अल्ब्राईटनको पासमा सिन्जी ओकाजाकीले गोल गर्दै अग्रता घटाएका थिए।
दोश्रो हाफमा लेस्टरले पेनाल्टीको मौका पाएपनि रियाद माहरेजले त्यसको सदुपयोग गर्न सकेनन्। ७२औं मिनेटमा उनले प्रहर गरेको पेनाल्टीले जाली चुमेपनि उनले पेनाल्टी प्रहार गर्दा खुट्टा चिप्लिएर दुई पटक बल छोएका भन्दै रेफ्रीले त्यसलाई अमान्य घोषित गरेका हुन्।
जितसंगै म्यानचेस्टर सिटिले लिभरपुललाई अंक तालिकामा उछिनेको छ। सिटीको ३६ खेलमा ७२ अंक छ भने लिभरपुल समान खेलमा ७० अंक लिएर चौथो स्थानमा रहेको छ।
